‘Complete player ka ni’ – Cristiano Ronaldo
‘Complete player ka ni’
– Cristiano Ronaldo
Tunhnai khan Al-Nassr leh Portugal superstar Cristiano Ronaldo chuan ‘complete player’ an tih ang kha a nih thu sawi chungin football-a tha famkim (perfect) ni tur erawh chuan hmabak a la neih ve tho thu a sawi!
A tawi zawngin football-a ‘complete player’ an tih chu an khelhna position atana theihna leh thiamna (quality) engkim kawltu hi ti ila a funkim mai awm e.
Chu tehna hmang chuan Ronaldo hi en ta ila, winger ni turin a hleitling a, a chak a, a tuan a rang bawk.
Chuti ang player-te chu rilru lamah pawh paukhauh tak, an career-a a tha lam leh chhe lam pawh pangngai taka paltlang thei mi, thlen china duhtawk mai loa mahni leh mahni, team-mate leh tumpuite nena inel reng, referee, supporter leh media nena khawsaho thiam, chak ni leh tlawm niah pawh inthunun thei mi, emotional game-ah pawh talbuai mai loa theihna lantir thei kan tih ang chi ti pawhin a sawi theih ang.
Ti chuan, kum 39 mi ni tawh chunga tunhnai mai pawha ram tana goal hnih la khung zak zak leh kan hma lawk Germany ram European Championship-a Portugal captain leh an innghahna pui ber la ni tur Ronaldo hian ‘complete player’ a nih thu sawi chungin heti tak maia a daihrei chhan thuruk a tarlang tel.
He evergreen forward hi tlakhniam leh chetchhiat ngawih ngawih, hliam avanga talbuai pherh hrep nei loin kum 20 chhung teh meuh chu he game-ah hian a theihna sangber zelin a inlan tling ta a; Manchester United a zawm hnu kum 2003 atanga khawvel mitfukna a nih tan atang khan a kalna hmun tinah trophy-in a zui zel a, England a ni emaw, Spain, Italy leh Saudi Arabia pawh ni se goal leh trophy lakpui loh a nei lo a, Ballons d’Or chawimawina vawinga dawng tawh bawkin, chutih kawnga a record siam tawhte pawh sawi mai sen a ni lo hial ang!
All-time great an tih zinga tel der tawh Ronaldo hian tunhnai khan UEFA official website kaltlangin a mimal chungchang thenkhat a sawichhuak a, “Kumtin hian kan panna lai hnawhkhat turin tan kan la a, hmasawnna lai tur hi a lo la awm zel mai.
Kei ngei pawh hi ‘complete player’ niin ka inngai a, mahse, tha famkim ni tur chuan hmabak ka la nei a, heti zat kum tawhah hi chuan tunhma ang kha a ni thei tak tak tawh lo a, theihna thenkhat kan hloh tawh a, kan panna lai hnawhkhah leh insiamrem zel tum kan mamawh.
“Chu tak chu a pawimawh a, miin daihrei a duh chuan eng hun leh boruakah pawh insiamrem theih zel (adaptability) lai hi a mamawh a, chumi tura theihna pawh a neih a ngai tel.
“Chu mawlh chu kei pawhin neih zel ka tum a, level sang bera kum 20 lai ka khel thei hi thil thleng palh a ni lo. Performance tha hnutchhiah reng thei tura beih hi tih namai a ni lo. Inpekna leh thawhrimna tel lo chuan heti zat kum chhunga highest level tawnbuak reng hi thil theih a ni lo,” tiin a daihrei chhan thuruk a sawichhuak.
CR7 hi mipa zinga European Championship vawinga khel tling hmasaber a ni a, Euro 2024 hiana record a tichhah lehzual dawn a ni.
Chuti ang mi chuan history book-a bung thar a kai tur leh Euro tournament vawiruk khel tling hmasaber a ni leh tur chhuanawm a tih thu tarlang telin, a career-a a tlo em em mai chuan amah pawh phurna nasa tak a pe tih a sawi a, ram tana a la inlan thei leh goal a la khung kal zel chu a hlimpui hle tih a tarlang tel.
Thawhlehni zan international friendly match pakhatah second half tir lam minute 10 chhunga captain Ronaldo goal hnih leh first half-a Joao Felix goal khat tihluh hmangin Portugal chuan an mikhual Republic of Ireland lakah 3-0 hnehna an chang a, Cristiano Ronaldo hian ram tan goal 130 a khung tling ta a ni.
Aveiro khaw inkhel kha Roberto Martinez-a team tan Euro 2024 warm-up game hnunghnungber ni tawhin, June ni 18 khian Germany ram tournament lian bul an tannaah Czech Republic an hmachhawn ang.
Tun kha interim manager John O’Shea hnuaia Irish-ho tlawm vawihnihna a ni.