Cong ten Karnataka-ah ‘majority’ lak inring

Senior Congress leader Jairam Ramesh chuan Karnataka Assembly poll-ah BJP ten Prime Minister Narendra Modi hminga vote an zawn laiin Congress-te chuan PM-in a aupui ber ‘tualchhung tan’ tih chu auhlaah an nei thung tiin a sawi.
PTI tena an kawmnaah Ramesh chuan Karnataka-a BJP tena kum li chhng rorelna an chan tawh hnuah ‘Vitamin-P’ mamawh a ni a, P chu Congress ‘performance’ tihna a ni a, BJP te P ‘polarisation’ chu mamawh a ni lo a ti.
Amred forces’ terminology hmangin Ramesh chuan Congress te chuan ‘carpet bombing’ campaign strategy Prime Minister Modi kalpui chu an hlauthawng lo tia sawiin senior BJP leader te chuan ‘anti -aircraft guns’ buaipui tham an nei tawh a ti bawk a.
BJP tena carpet bombing campaign nasa zawk an kalpui poh leh an ‘beidawnna leh manganna’ a hluar ting a ni mai tiin Congress general secretary in-charge communications chuan a sawi bawk.
Ramesh hi Congress star campaigner niin Karnataka poll chu BJP vauna versus Congress’ governance guarantees inbeihna a ni a ti bawk.
Congress te chuan majority an neih tur thu sawiin ‘Operation Lotus’ chu tul lovah kan chhuah ang a ti bawk.
Operation Lotus hi opposition party tena BJP tena state sorkar paihthlak nana MLA te an pel thin sawi nana an hman a ni.
Chief Minister hlui Siddaramaih leh Karnataka Congress president DK Shivakumar tena CM post an inchuh tia sawi chungchangah Ramesh chuan, “Tun tuma Congress chhunga lungawilohna hi a ve lek chauh a ni a. Tlan tau thenkhat independent candidate nih tum an awm a, a thente chu an inhnuhdawk leh tawh zawk,” tiin a sawi.
“Congress-a lungawilohna hi BJP-a lungawilohna nen chuan khaikhin chi pawh a ni lo. BJP-ah chuan an chief minister hlui, deputy CM, national executive member te leh national, state leh local level leader te an titau vek a ni” tiin Ramesh chuan a sawi bawk.
Congress leader panga – party chief Mallikarjun Kharge, Rahul Gandhi, Priyanka Gandhi Vadra, Siddaramaiah leh Shivkumar te chuan campaign neih laiin constituency 224 an tuam chhuak vek tiin a sawi bawk a.
“Tun tum hian united front kan chhawpchhuak a, hengte hi Bharat Jodo yatra hrin vek a ni. Mi thenkhatte chuan Bharat Jodo Yatra kha an sawisel a, inthlanah awmze nei lo tur an ti a, mahse yatra khan awmzia neiin Congress-ah tuina a thlen a ni,” tiin Ramesh chuan a sawi bawk.
Tuna Karnataka politics luahtu ber zawk chu BJP-a lungawilohna leh inlungruallohna zawk chu a ni, tiin Ramesh chuan a sawi bawk.
“Tunah hian mitin te buaipui ber chu Congress tena thuneihna an chan leh theihna tur a ni a. Mimalah kan inthlurbing ve lo va. Mimal tana beauty contest a ni lo va, political party duhthlan tur, ideology a duhthlan tur, Karnataka hma lam huna duhthlan tur zawk a ni,” tiin Ramesh chuan a sawi bawk.
Karnatak voters te chu an fing a, eng level-ah pawh tute nge an vote turah an chiang vek a ni. Prime Minister tur thlang turin vote an thlak dawn lo va, state-a sorkar tur an vote dawn tih an chiang a ni tiin a sawi bawk a.
“PM auhla hi amah aiin kan la thutak zawk – tualchhung tan tih hi kan kalpui ber a ni,” tiin Ramesh chuan a sawi bawk a.
“National election a ni lo va, assembly election a ni a, BJP te hian Prime Minister chu issue a siam an tum a ni. Narendra Modi hmingin vote an zawng a. Kei nina kan sawi ber chu vote inthlakin MLA tur in vote a, CM thlang tur party vote in pe a ni kan ti a. Delhi engine tur ni lo Bengaluru engine tur atan vote an thlak dawn a ni,” tiin Ramesh chuan a sawi bawk.
BJP tena double engine an sawi hi Karnataka-ah chuan awmzia a nei lo, a chhan chu State-in revenue 94% vel a neih te hi a tharchhuah liau liau leh central tax a share te a ni a, hei vang hian ‘double egine’ sorkar in awmzia a nei ve lo a ti bawk a. Congress te chu double engine tak tak zawk an ni, a ti bawk.
Seat engzah nge an lak ang a sawi mai theih loh thu sawiin mahse ‘Operation Lotus’ awmze nei lova siam turin majority an nei ngei ang tiin a sawi bawk a.
“Chikkamagalaru district a ka campaign naah seat khat chauh kan neihna a ni a, mahse, tun tumah hian seat nga ah seat li tal kan la ang” tiin Ramesh chuan a sawi bawk a. Congress party duhna nasa tak a thleng mek tiin a sawi bawk a.
Sorkar thei an awm lovang tia sawi hi ka pawm ve lo. Congress in majority kan la ngei ang a. BJP te hi chuan thendarh bak an buaipui lo va, chu chu mipui ten an hne tawh a ni,” tiin a sawi bawk.