Congress an sawrkar chuan UCC leh Forest Act thiah tiam
Centre-a Congress an sawrkar a nih chuan Uniform Civil Code leh Forest (Conservation) Amendment Act 2023 chu an thiat leh dawn tih Congress hruaitute chuan an sawi.Mizoram tlawha rawn zin All India Congress Committee team chu an hruaitu, Mizoram in-charge Bhakta Charan Das hoin Zirtawpni khan Central YMA hruaitute an kawm a. Congress-in central leh Mizoramah sawrkarna a chan chuan UCC leh Forest (Conservation) Amendment Act 2023 chu hnam tlem zawk leh sakhaw dang tan a him loh avangin an thiat dawn a, an kalpui ve dawn lo tih an sawi. FCAB 2023 chu ram neitute tan a him loa, mahni ramah pawh thunei thei loa awm chu mihring dikna leh chanvo palzutna nasa tak a ni, tiin, kalpui chi a ni lo tih an sawi.
Sakhaw tlem zawkte tana dan him lo, innekchep leh chimral tuma inrikrapna leh rawva taka sakhaw dang vuantute nghaisak chu Congress party chuan a din tirh atanga a do tlat, tih reh a tum pawh a ni, tih AICC hruaitute hian sawiin, hetianga sakhaw dang nekchepna hi state-ah leh central-a Congress a sawrkar chuan a ti reh tura hmalakna hmasa tur zinga mi a ni tih an sawi. “Central YMA hian min thlawp rawh u, kan ti a ni loa, Congress party-in sakhaw hrang hrang leh hnam tlem zawkte tana kan ngaihdan leh kan dinna hi hria u la kan duh vang a ni,” an ti.
Central YMA hruaitute hian vice president Lalhmachhuana hoin an lo dawngsawng a, ‘ram leh hnam humhalh’ a pawimawh zia an lo sawi a. Sakhaw zalenna (secularism) pawimawh zia sawiin, party mal anga thlawp an neih ngai loh thu an sawi rualin, an hmalakna tha an tih thu AICC hruaitute hi an lo hrilh a ni.
Ni thum chama Mizoram tlawha rawn zin All India Congress Committee hruaitute hi, Union minister hlui, AICC i/c Mizoram Bhakta Charan Das bakah Observer for Mizoram Sachin Rao, thupuangtu Mathew Antony, Media & Publicity chairman Pawan Khera, Social Media chairperson Supriya Srinet leh Dr Summit Dubey te an ni a. An party hruairtute, journalist te leh Central YMA hruaitute an kawm a, kohhran hruaitute kawm an tum chu hun remchang a awm thei ta lo nia thu dawn a ni. Vawiin, Inrinni hian Delhi an pan leh ang.