Congress chief Kharge-a’n Trump-a salah Modi-a puh

Congress chief Kharge-a’n Trump-a salah Modi-a puh
Congress party President Mallikarjun Kharge-a chuan Pathianni khan Asia khawthlang buaina zual zela India dinhmun leh Russia tuialhthei lei chungchanga US thutlukna siam chungchangah Prime Minister Narendra Modi-a chu na takin a bei a, US President Donald Trump-a chu ‘dictator’ tia sawiin Modi-a chu a ‘gulam’ (sal) ang maia che niin a puh.
Karnataka-a Chittapur-a Rs. vaibelchhe 1,069 senga hmasawnna hna thawh tur a hawnnaa mipui hmaah thu a sawiah Kharge-a hian Modi-a sorkar chu Iran nena buaina chhuak mek karah India-in mahni thua kal dan a neih zawng zawng Washington kutah a hlan niin a puh a ni.
“Ani (Trump) hi dictator a ni a, Modi hi a gulam (sal) a ni,” tiin Kharge-a chuan tun hnaia US-in ni 30 chhung atan India chu ngaihhnathiamna pein Indian tuialhthei thlifimtuten Russia tuialhthei lei a phalsak niin a sawi.
Kharge-a chuan he thil hi India-in ama thua ram dang a dawr dan zawm aiin American nawrna hnuaiah a che tih a tilang niin a sawi a. “He thil hi i pawm dawn em? Congress party hian British hnen atangin ram zalenna an hmu a… Saltanna tura ram hruai turin thuneihna i chang em?” tiin a zawt.
Congress hotu chuan a sawi zelnaah Prime Minister Modi-a chu Jeffrey Epstein case file hmangin Trump-a’n ‘a thunun’ niin a sawi bawk.
“He thil hmang hian Trump-a hian Modi-a hnar a mansak a… Epstein files hlauvin Modi-a hian a lu a thing a, a hmui a khar a ni,” a ti.
Hetih lai hian sorkar laipui chuan Epstein file-a Modi-a telna nia sawi chu a hnawl vek a, ‘mi sual thiam loh chantir, hmuhsitna ber nena hnawhchhuah phu tawk, rinngam tak tak awm lo’ niin a sawi.
Kharge-a’n US-in Russian tuialhthei lei a phalsak leh lailawk a sawi hi Asia khawthlanga buaina chhuak mek avanga khawvel puma inpek kualna buai tihziaawmna tura Washington-in Moscow atanga tui kawngah lei a khalsak tawhna thla khat chhung a hlih lailawk chungchang a ni.
US Treasury Secretary Scott Bessent-a chuan US chuan, “Khawvel hmun hrang hranga tuialhthei inthawnnaa hun eng emaw chen buai tihziaawmna turin tuipuiah Russia tuialhthei lei turin India hi phalsak remtih a ni,” tih a lo sawi tawh a. Energy Secretary Chris Wright-a pawhin Washington chuan ‘India-a a thiante’ hnenah tuialhthei hi thlifima a rang thei ang bera hralh turin a hrilh niin a sawi bawk.
Sorkar chuan he thusawi hi hnawlin India chuan Russian tuialhthei lei turin eng ram atanga phalna mah a mamawh ngai lo tih a sawi a, ngaihhnathiam an ni hian hun eng emaw chen chhung chu inhnialna a titawp mai dawn niin a sawi thung.
Hetih lai hian Congress chuan Modi-a sorkar chu ‘dawihzepah’ a puh. Party General Secretary Jairam Ramesh-a chuan Bessent-a thusawi hi sorkarin President Trump-a thupek chu rinawm takin a zawm tih tilangtu certificate ang a nih thu a sawi.
Kharge-a hian Iranian Supreme Leader Ayatollah Ali Khamenei thah chungchangah US chu a sawisel bawk a, ram thuneihna nei hruaitute beih chuan khawvel remna a tichhe thei tih a sawo.
“Ram hruaitu chu thah a nih chuan chu ram leh khawvel hi a him ang em? I ngaihtuah ang u,” a ti.
Tun hnaia Iranian lawng, IRIS Dena chu Indian Ocean-a US tuihnuailawngin a tihpil thu a sawi bawk a, Modi-a sorkar chet dan zawtin India tichhe thei ramte hnena prime minister-in eng vaukhanna nge a neih a zawt.
Kharge-a hian US nena insumdawn tawnna chungchanga inbiaknaah sorkar chu a bei bawk a, India chu lo neitute rilru tina thei tur inremna siamtir a nih thu a sawi.
“India-a cheng 65% hi lo neiha innghat an ni a, America-ah erawh chuan 3% chauh a ni a. Kan lo neitute hi engtin nge an awm ang? Chutiang mite nena inthian thatna nen chuan kan ram hi in tichhia a, saltanna kawngah in nawr lut a ni,” a ti.
Sorkar hmasate chuan ram hrang hrang – Russia, Iran leh Venezuela atangin tuialhthei man azirin an lei a, tunah erawh chuan American nawrnain a nghawng niin a sawi bawk.
Kharge-a ang bawk hian eptu hruaitu dangte pawhin Asia khawthlang buaina chungchanga sorkar kalphung an zawt ve mek bawk.
Shiv Sena (UBT) hruaitu, Sanjay Raut-a chuan kar tin a column-ah US leh Israel-te chu ‘global bully’ angin an che tih a ziak a, chutih laiin ‘India ang ram lian, huaisenna inchhuangte chu an agent angin an che a ni’ tiin a ziak.
AIMIM hotu, Asaduddin Owaisi pawhin Prime Minister Modi-a chu buaina chungchanga ‘a ngawih rengna titawp’ turin a ngen a, Trump-a chu indona titawp turin a ngen bawk.
Asia khawthlang buaina hian khawvel pumah ram hrang hrang inpawhna a titang zual a, energy sumdawnna tibuaiin, IRIS Dena pil leh Iran hruaitute thah a nih avangin boruak a sosang zual.
Kharge-a chuan Modi-a kaihhruai sorkar hnuaia India-in ram dang a pawh danin ram pum huapa a dinhmun a tihniam niin a sawi a. “Tun hma chuan khawvelin India a zah a, Jawaharlal Nehru-a kaihhruai Non-Aligned Movement chuan khawvel remna a siam,” a ti a, tuna sorkar hian khawvel ram chakna lian ber berte nena inlaichinna a neih theih loh thu a sawi bawk.