Congress chuan BJP dan siam thar hi kan sut dawn – Lalsawta

Sakhaw zalenna leh hnam inpumkhatna atan Congress a sawrkar leh a ngai tih Congress president Lalsawta chuan a sawi a. Centre-a an sawrkar chuan BJP-in dan a siam thar ho chu an sut leh vek dawn tih a sawi.
MLA inthlanpui atana Tawi biala Congress party ticket-a ding tur Lalringliana Khiangte phochhuah leh campaign khuhhawnna Thawhlehni khan Keifangah neih a ni a. He hun hmanpuitu Lalsawta chuan India leh Mizoramin hun khirh tak a tawk a. BJP-in min rawk mek a, state thenawm Manipur-ah a result kan hmu tih a sawi.
India ram leh Mizoramah sakhaw zalenna a pil bo tial tial a, Kristian missionary-te dinhmun a derthawng a, Pathian rawngbawl tha thei loin an awm a; Foreign Contribution Regulation Act khirh tak duan a ni tih sawiin, Hindu thil ringawt buaipuiin Ayodhya Temple sak leh Kristian-te tana him lo Uniform Civil Code bill min dinpui an tum bawk tih a sawi. “BJP leh a thawhpui party-te hi India ram leh Mizoram tan an him loa, kan thlangtling leh a nih chuan kan hmabak hi a eng lo hle. Sakhaw zalenna duhtu Congress party a sawrkar a ngai a. Mizoram leh central-a kan sawrkar a nih chuan hnam inpumkhatna tichhe thei dan thar hrang hrang hi kan sut leh vek ang,” a ti.
Mizoram tana tha tur an ngaihtuah rualin BJP leh a thawhpuite an dodal tel zel dawn a. Party anga dodal niloin Kristian-te tan an him loh em avangin an dodal dawn tih a sawi.
Kuthnathawktuten eizawnna ngelnghet kan neih theihna turin ‘Tang Puihna’ an siam dawn tih Congress president hian a sawi. “He thil hi a thlawna sem niloin tang tak takte puihna tur, eizawnna ngelnghet kan neih theih nana din a ni dawn. Party dangten sawi nep tum thin mah se, Congress party-in kan ti ang, kan tih chu kan ti mai thin a, kan ti leh tak tak dawn a ni,” a ti.