Congress-in health insurance ah chhungtin Rs. nuai 15 thleng tiam

Congress party chuan sawrkarna an chelh chuan chhungkaw tin hnenah cheng nuai 15 thleng cashless-a bill theihna an tiam tih an sawi a. Hei hi a tih theih dan an zirchiang vek tawh a, an ti ngei dawn tih an sawi.
MPCC Media department hotute sawi danin, Rajasthan-a Congress sawrkarin he health insurance hi a hlawhtlin pui a, Mizoramah pawh hlawhtlinpui ve ngei an tum tih an sawi. Cancer leh natna khirh dangte enkawlna turin Congress chuan cheng vaibelchhe 5 fund dah a intiam tih sawiin, district hospital tinah diagnostic centre changtlung tak dah vek a, a changtlung thei ang bera damdawi in pawh thuamthat vek an tum tih an sawi.
‘Mi tam tak nunna chhan tur leh nun nuam zawk kan neih theih nan kan healthcare system tih hmasawn a, dinhmun chhe taka dahtu rorel tlak lo, pawisak nei lo leh hlemhletna laka fihlim lo MNF kan mangtha a hun ta,’ an ti.
MNF-in chhungkaw tin tana Mizoram State Health Care Scheme hnuaia health insurance nuai 2 a tiam chu a hlawhchham chiang hle tih an sawi a. 2023- 2024 budget-ah health sector atana cheng vaibelchhe 751 an dah chu khawnge a awm pawh an hre tawh lo tih sawiin, ‘Heti chung hian mipuiin sum an hmuh let tur an hmuh let loh sawrkarin a bat sak zat chu cheng vaibelchhe 63.88 a ni a. 2021-2023 chhunga mipui atanga health care premium an dawn, cheng vbch. 15 pawh thawktute hlawh atan an hmang vek a ni,’ an ti.