Congress-in mipui thlavang hauh

Congress-in mipui thlavang hauh
Congress party chuan Zirtawpni khan Vanapa Hall kawtah ‘India Danpui Humhimna leh Mizoram Mipui Thlavang Hauhna’ an hmang a, Congress Bhavan thleng kawng an zawh zui a ni.
MPCC Political Affairs Committee (PAC) member John Siamkunga chuan, BJP-in Indira Gandhi hoa emergency an puang kha India danpui thahna ni, ‘Samvidhan Hatya Diwas’ an ti a; Mizoramah pawh an hmang tih sawiin, “BJP hian engtin nge danpui thahna tiin an sawi theih zawk? India ram hi socialist pattern-in kan kal a, socialist pattern-a kan kal vang hian ni za inhlawhna, food security thlengin kan dawn phah a ni. Sakhaw tih bik nei lo – secular ram kan ni a, kan zavaiin kan sakhua theuh zalen takin kan be thei a ni,” a ti.
Citizenship Amendment Act chu amend phal loh ni mah se, BJP-in an amend pui tlat a. Kristiante phei chu foreign sakhua tiin, an telh duh lo a. Hmanlaia lo awm tawh Muslim pawh an telh duh lo tih a sawi. India ram Hitdutva-a siam duhtu chu RSS an ni a, Kristiante nekchep rengtu an ni, tiin, “Heti hian zawi zawiin min nekchep reng anga, an duh chu engtikah emaw chuan an ti dawn tho tho a ni,” a ti.
A ni bakah hian PAC member dang pahnih – TT Zothansanga leh John Rotluangliana ten thu an sawi bawk a. Mizorama ZPM sawrkar-in mipuia chhiah lak a tihsanna, GST khawn tlahniam zel, contract hna-a restricted tender tih tlem tiam chunga an tih reng thu, VIP-ten lirthei pakhat bak an hman dawn loh thu an sawi chunga lirthei pakhat aia tam leh a thar man to tak tak an hman leh si thu, kuthnathawktute tana budget-a sum an dah tlem leh an intiam anga an tih sak leh loh thu te an sawi.
2023 MLA inthlan hma lawka ZPM-in sum hman tur an ngah thut chhan chu BJP puihna an dawn vang a ni, tih pawh sawiin, tunah BJP zawm duh loh angin awm mah se, nakinah an la zawm nge nge ngei an rin thu te an sawi bawk.