Congress-in Pathian hruai theih hruaitu kan nei – Dr Lalmalsawma

Kan ramin hruaitu tha zui tlak kan zawng mek a, Congress party-in Pathian hruai theih hruaitu tha Pu Lalsawta kan nei, tiin Congress treasurer Dr Lalmalsawma Nghaka chuan a sawi.
Zirtawpnia Congress Bhavan-a political session-ah Dr Lalmalsawma chuan kan ramin hruaitu tha zui tlak kan zawng mek a, hruaitu chu kan nei a, Pathian pawhin a hruai duh laiin, Pathian hruai theih an nih a ngai, tia sawiin, “Kan ram rum tlawk tlawk hi chhanchhuak turin Congress-in hruaitu tha kan nei a. Pathian hruai theih hruaitu Lalsawta kan nei,” a ti.
Mizoram dinhmun ngaihtuah chianin, lal chhungkua leh an khawnbawlte tan lo chuan tah leh hathialnaah a chang mek tih a sawi a. MNF sawrkar hnuaiah record tamtak a chhe zawngin kan siam mek zel, tiin, “Tumkhata ruihhlo man hal tam ber record, nungcha dan phal loh man hnemna ber state, GSDP atanga teha leiba ngah ber state min nih pui mek,” a ti.
MNF sawrkar hnuaiah sumdawngte leh chawhmeh zuarte an beidawng a, sawrkar hnathawkte pawh a hun taka hlawh an lak theih loh avangin an beidawng mek a. MNF mi leh sa ngeite pawh bill lak theihloh vangte in an beidawng mek niin a sawi. “Vawiin anga kan ram dinhmunah hian tumah ralbang thei kan awm lo, hnam boral thei dinhmunah kan ding a. Ngaihtha taka awm theih a ni lo,” a ti.
Assam CM Himanta Biswa Sharma thusawi, ‘Kristiante hi Corona Virus anga kan nuaibo an ngai,’ a ti nia sawiin, ngaihthah theih a ni lo tih MPCC treasurer hian a sawi. “Mizoram CM, BJP thawhpuitu hian khulama chi leh chi, sakhua leh sakhua intihbuainaah khuan awka a nei ngamlo. Chuvangin BJP dodal theitu awmchhun Congress kan sawrkar leh ngei a ngai,” a ti.