Congress-in vice president thar nei mai thei

A then an chhuah laiin Congress party-ah lut thar an
awm dawn a nih hmel a, vice president thar pawh an nei mai thei.
Kar hmasa Zirtawpni khan Congress Bhavan-ah an president Lalsawta’n mi thar lawmluh runpui an neih tur thu a sawi a, hemi atan hian Congress party hi an inbuatsaih nia hriat a ni.
Tute nge an lawmluh dawn tih hi hriat a har a, mahse chiang tawh pahnih chu an awm tih thu dawn a ni.
Thawhlehni khan chief secretary hlui Lalnunmawia Chuaungo chuan a hna chelh mek chief information commissioner a nihna a bansan a, larsap hnenah banna a thehlut. Social media-ah a darh nghal a, a term a zawh hmaa hetia a bang hi, political party a zawm dawn tihnaah ngaih a ni.
Chief secretary hlui hian Congress party a zawm dawn a, thil an tifel tawh tih thu dawn a ni.
Inthlanpuia candidate atan chauh ni lovin, party vice president atan an inbia tih thu dawn a ni a, thil a inher kual a nih loh chuan Lalnunmawia Chuaungo hi Mizoram Pradesh Congress Committee vice president thar a nih a rinawm.
An vice president ni lai chu Lal Thanzara a ni a, Con gress party hian senior vice president an lo neih tawh thin avangin ani hi senior vice president a ni mai thei tih thu dawn a ni. R Lalzirliana leh J Lalsangzuala te pawh senior vice president an lo ni tawh.
Lalnunmawia Chuaungo hi inthlanah Congress ticket-in Aizawl North I bialah a din a rinawm tih thu dawn a ni bawk; he bial hi Congress party atangin vil an awm rih lo nia ngaih a ni.
Ani bakah mi thar lawmluh beisei an nei a, pakhat chu a chiang tawh; Aizawl khawpui chhunga an party candidate ni tura lawmluh tur pakhat an be fel tawh a, ani hi an lawmluh thuai a rinawm.
Biak lai mi dang pawh an awm a, anni erawh a chian leh chian loh hriat a ni lo. An dawr lai pakhat chu sorkar hnathawk a ni a, party a zawm dawn a nih chuan a hna atanga a ban a ngai dawn a ni.