Congress-in vote tihchingpena a puh ECI leh BJP sawrkar duhlohna lantir

Congress party chuan Election Commission of India leh BJP chu vote ruk leh tichingpenah puhin, Ningani khan Aizawlah he thil an duhlohna lantirin an pungkhawm.
MPCC Political Affairs Committee member John Siamkunga chuan, tunlaia India ramin a buaipui em em chu ‘vote chor’ vote inruksak, vote tihchingpen, hming lem hmanga electoral roll-a inthun, house number leh address tel loa e-roll a inthun a ni tih a sawi a. A tirah chuan politic-a inpuhchhiatna nia ngaih a ni a, mahse a tak a lo ni si a, India ram news lianten an tarlang chuai chuai ta tih a sawi a ni.
Rahul Gandhi leh a hoten state leh Lok Sabha inthlan thenkhatah thil rinhlelhawm a awm nia ngaiin an chhuizui a, thil diklo tam tak an hmuchhuak tih John Siamkunga hian a sawi a. Heng inthlana electronic data hi an nei thei a nih chuan, election kalta te an chhuilet anga, BJP sawrkar hi diklo taka din a ni tih an phawrh thei dawn tih Rahul Gandhi hian a sawi thu a sawichhawng bawk.
Tuna Bihar inthlang turah pawh intensive electoral roll revision-ah thil diklo tamtak a awm tih sawiin, mi nuai 65 chu chhuanlam hrang hrang siamin an paih a, pem angte, mithi tawh anga vote an delete sak pawh an awm a. Mitthi tawh anga an sawi e-roll atanga an paihte inah ngei hian Rahul Gandhi hi a lenglut nghe nghe tih a sawi a ni.
He thil avang hian Rahul Gandhi hi India mipuiin an ngaihven thar nasat phah a, Congress kaihhruai INDIA Block boruak a kang chak hle tih MPCC hruaitu hian a sawi a. Mipuiin ‘vote chori’ vang hian BJP chu diklo taka bumtu ah an ngai tawh tih a sawi.
Mizoramah pawh Congress party a thang mek zel a. Congress sawrkar laia mipuia sum luanglut tam thin zia, chhungtin sum lakluh dan, mipui an hlim zia kha mipuiin an la theihnghilh loa, kawng hrang hranga an hlawhtlin theihnan leh an dinchhuah leh theihnan hma an la mek a, mipui zarah an sawrkar leh ngei an ring tih a sawi a ni.