Congress inthlang tur an \ang

Mizoram Pradesh Congress Committee (MPCC) an inthlang dawn a, chuh tumte leh anmahni tantute an tang hle.
Congress party hi February ni 20-ah an inthlang dawn a, elected office bearers pathum leh executive member tur 60 an thlang dawn a ni.
Ningani khan scrutiny an ti a, office bearer nih tuma hming pe mi parukte zingah tlang lo an awm lo.
Office bearer nih tum hian mi parukin hming an pe a, line pakhatah president atan Lal Thanzara, vice president atan Lalnunmawia Chuaungo leh treasurer atan Dr Lalmalsawma Nghaka te, line pakhat dangah president atan Zodintluanga Ralte, vice president atan C Ngunlianchunga, treasurer atan Lalrindika Ralte an ni.
Lal Thanzara te line hi official candidate tih an ni a, a lehlam hian official candidate an ni lo tiin an sawi ve thung. Official candidate an awm leh awm loh chungchang hi an inhnialna pakhat a ni. Official candidate an tihte hi party-in official candidate tiin an puang ngei a, mahse a lehlam hian official candidate ni tura thlan an nih dan hi a dik lo tiin an hnial a ni.
An party president hlui, chief minister hlui Lal Thanhawla hming a lo lang a; July ni 7-a Zodintluanga Ralte-in inthlana ding tura hming a pekin thlawptu-ah a tang a, an danah rawttu leh thlawptu an awm a ngai; hemi ni vek hian thupuan a nei a, official candidate a thlawp thu a puang leh thung.
Zodintluanga thlawptu ni tura hming a sign ngei thu a sawi a, amaherawhchu “party official candidate khin hi party dan kalh zawnga chetna (anti-party) a ni tih ka hria a” tiin, “Lal Thanzara hi ka nau a nih vang ni lovin, tu pawh ni se, official candidate a nih avangin ka theihpatawpin ka thlawp a ni tih ka puang e,” a ti.
Executive member atan mipa 50 leh hmeichhia 10 an thlang dawn a, mipa 85 leh hmeichhia 16 te’n hming an pe. Hmeichhe pakhat chu a nihna chelh mek avanga executive member ni sa a nih avangin, scrutiny-ah hian paih a ni.