Congress la insiam rem leh lo

Congress party-in inthlanpui lo awm tura an party
candidate tur an tifel deuh vek tawhah ngaih a ni a, mahse an tihfel tawh hmun thenkhat chu ennawn leh a ngai tih thu dawn a ni.
Palak, Tuichawng, Mamit leh Aizawl South I bialtea ding tur an la tifel lo nia ngaih thin a ni a, tun hnaiah Mamit an tihfel hnu-ah an tihfel sa Kolasib bial lam an ngaihtuah nawn leh a ngai dawn nia hriat a ni.
Kolasib bialah hian minister hlui Lalawmpuii Chawngthu chu ding tura ngaih a ni a, he bial hi chin fel tawh niin, ding tura ruat pawh hian ke a pen hman. Mahse he bialah hian mi dang an ding leh mai thei tih thu dawn a ni.
Thu dawn danin, Lalawmpuii Chawngthu hi Aizawl South I-ah zawk a ding mai thei a, hei hi ngaihtuah tura chhawp mek a ni. Aizawl South I-ah ani hi ding dawn ta se, Kolasib biala ding tur ngaihtuah a ngai ve leh thung ang. Amaherawhchu, Kolasib-ah hian ding awma ngaih mihring an awm sa avangin chin fel hi a har lo turah ngaih a ni.
MLA an neih mekna Palak bial pawh mi thar an din a ngai dawn a, he bial MLA ni lai KT Rokhaw chu MNF-ah lutin candidate a ni zui dawn tih a chiang tawhah ngaih a ni. Palak bialah hian IP Junior hming a ri a, thudawn pakhatah chuan ani hi chiang tawhah ngaih a ni. Mahse hming dang pawh a ri tho.
Bial la tihfel loh Mamit pawh hi fel tawhah ngaih thei a ni ve tho; he bialah hian K Lalzamliana a ding dawn nia hriat a ni a, chiang tawha ngai pawh an awm.