Congress leh HPC (D) inremna angin Council-ah hma kan la ang – Lal Thanzara
Congress leh HPC (D) inremna
angin Council-ah hma kan la ang
– Lal Thanzara
Kumin November 5-a Sinlung Hills Council inthlan turah Congress party chuan Nilaini khan Sakawrdaiah campaign an khuhhawng a. MPCC president Lal Thanzara chuan, an party-in sawrkarna an siam thei a nih chuan HPC(D) nena inremna an lo neih tawh angin Council kal zel dan turah hma an la dawn tih a sawi.
“Congress party-in hnehna kan chan chuan Congress leh HPC(D) inremna angin, Sakawrdaiah ngei headquarters kan bunin hma kan la dawn. Sinlung Hills Council-ah hian Congress-in sawrkar kan siam a nih chuan kan fund neih ang ang kan hmang tangkai dawn a. Sawkawrdai leh a chhehvel khua hian sum lengvak velin nitin khawsak a tihziaawm kan beisei a ni,” a ti.
HPC(D) nena inremna chu Congress sawrkar hmalakna a ni tih Lal Thanzara hian a sawi a. MNF a sawrlar laiin HPC(D) nen an inbia a, Pathian malsawm tlak a ni lo nge, a hlawhtlinna hmel hmuh tur a awm loa, Congress sawrkarin remna leh muanna a ngaipawimawh a, theihtawp a chhuahna azarah inremna a lo awm thei tih a sawi.
Chutih laiin ZPM hotuten kum 30 dawn lai sawrkarna chang tawh Congress chu engmah ti lo anga sawiin, thangthar thil hre pha lote ngaihtuahna an tibuai tih a sawi a. Mizorama hmasawnna hnathawh zaa 90 chu Pu Lal Thanhawla kaihhruai Congress sawrkar hnathawh a ni tih a sawi. SHC inthlanah hian Congress candidate-te vote tling turin a ngen tih a sawi a ni.
MPCC senior vice president Lalnunmawia Chuaungo chuan sawrkar leh HPC(D) inremna zawn lai khan sawrkar lamah a buaipuitu ah a tel ve a, mipui ngaihdan pawh lak a ni, tia sawiin, “Sinlung Hills Council area amite Council huamchhung mi an ni tur a ni a, vote pawh helaia chengte chauhin an nei tur a ni, tih chu mipui duhdanin Congress party chuan dan a siam a. Mah se, tunah chuan Council huamchhung ami ni lo pawhin an rawn chuh thei ta a, chu’ngte ai chuan a huamchhunga cheng, lu phum tur ngei lo thlang rawh u,” a ti.
SHC Hqrs chu Sawkardaia dah tur a ni tih chu an duhdan a ni, tiin, chumi atan chuan cheng nuai 300 dah a ni a, headquarters dinna turin nuai 150 dah a nih bakah Aizawlah Sinlung Hills House sakna tur dah a ni a, a hmun tur MINECO ah ruahman ni mah se, vawiin thlengin sak zawh a ni lo tih a sawi. Congress sawrkar a din chuan heng hi an tihlawhtling dawn tih a sawi a ni.