Congress leh ZPM a thuphungin inrem

Lai Autonomous District Council (LADC) inthlan a zo a, mahse sorkar tur a la chiang lo. Congress leh ZPM an inrem a, mahse sorkar intawm an siam ang em tih erawh a chiang chuang lo.
Thu dawn danin, Nilaini (December ni 10) zanah khan Lawngtlaiah Congress leh ZPM te chu LADC-a sorkar intawm siam tumin a thuphungin an inrem a, an inrem dan hi chiang taka hriat a ni rih lo.
Party pahnih inremna hi tihpuitlin a ni ang em tih pawh a la chiang lo a, hemi chungchanga biakpawhte pawh an chiang ngam lo.
Hetih lai hian Aizawlah ZPM hruaitute’n Congress leh MNF thawhpui loh an rel a, hei hi a dingchang a nih chuan ZPM leh Congress hi an thawk dun thei dawn lo tihna a ni.
December ni 10-ah khan Aizawlah ZPM PAC (Political Affairs Committee) an thu a, LADC-ah Congress leh MNF thawhpui loh hi an rel. Vote chhiar hma khan an lo rel tawh bawk.
Chutiang a ni chungin Nilaini zanah Lawngtlaiah ZPM leh Congress hi a thuphungin an inrem a, thil kal zel dan tur hriat a ni lo.
Aizawl atangin political party te’n Thawhlehnia vote chhiar nia Lawngtlaia awm turin hruaitu an intir a, party mala sorkar thei an awm loh avangin party-te hi an inbe nghal. Congress chu an vice president C Ngunlianchunga, tun tum LADC inthlana MDC atana tling a awm a, ZPM leh MNF hruaitu Aizawl atanga kalte chu Ningani khan thu mum nei lovin Aizawlah an kir. ZPM hruaitu, Lawngtlai atanga Aizawla kirte hian Ningani zan khan chief minister an hmu a, LADC chungchang hi an report tih thu dawn a ni.
LADC-ah hian ni 15 chhunga sorkar hi siam tur a ni a, hun chu a la awm. Mahse vawiin thlengin thu chiang a la awm lo a, political party-te’n sorkar siam hi an la tum theuh.