Congress party chauhin intiamna kan hlenchhuak – Lal Thanzara

Congress party chauhin
intiamna kan hlenchhuak
– Lal Thanzara
Mizoramah Congress party chauhin an intiamna an hlenchhuak thin a, party dang sawrkar chuan mipui a huam ve ngai lo tih Congress president Lal Thanzara chuan a sawi.
Village council inthlan zawh taka Kolasib constituency huamchhunga Congress ticket-a VC thlanthar leh candidate-te chawimawina Zirtawpnia Kolasib-a neih chu MPCC president hian a hmanpui a. Party rintlak leh rinawm nih lanna chu mipui hnena an intiamna manifesto leh policy tih hlawhtlin a ni a, Congress party chuan an intiamna an tihlawhtling a, an hlenchhuak thin tih a sawi.
“Party dang sawrkar hian mipui a huam ve ngai loa, mipui sawrkar tiamtute pawhin kuthnathawktute tana an intiamna, sawhthing lei chungchangah an party mi ni lo chu nasa takin an daidang a, MNF pawhin mipui huap hmasawnna an kalpui ngai lo,” a ti.
Sawrkar kan hrawn mek chuan engmah ruahman fel a nei lo, tiin, research base veka hma la nghal tura intiamin mipui sum min arkhawthimdai pui a, a buai nuaih a, a la buai dawn chauh tih Lal Thanzara hian a sawi.
NLUP khan a tha zawngin Mizoram hmel a her danglam tih sawiin, “Mizorama kuthnathawktute thlai thar phurhna kawng leh hmasawnna rotling zawng zawng a thawk chhuak. NLUP chuan chhungkaw tin a zawng chhuak a, an hnen a thleng phak a ni. ZPM sawrkar hian kuthnathawktute tana an intiamna hi mipuiin kan thlir a, tihlawhtling turin kan beisei a ni,” a ti.
Thutiam hlenchhuak thin Congress party chu Mizoram mipuiin nghakhlel takin an thlir a, chutiang tur chuan hmuntinah Congress party nasa takin a tho chhuak tih Congress hruaitu hian a sawi a. NLUP changtlung zawk hmangin chhungkaw tin thleng phak hmasawnna tluantling an thlen tir leh dawn a, NLUP changtlung zawk chuan tute mah a daidang ve dawn lo tih a sawi a ni.