Congress sawrkarin CBI hnenah consent a pe tawh – MPCC Legal chairman

Congress sawrkarin CBI hnenah general consent a lo pe tawh a; MNF sawrkar laia CBI consent pek chungchanga signature campaign neihah eptu MLA zingah hming sign ve duh lo awmchhun chu tuna chief minister ni lai chiah hi a ni tih MPCC hruaitu TT Zothansanga chuan a sawi.
Zirtawpnia Congress Bhavan-a inkhawmah MPCC Legal department chairman TT Zothansanga hian, 1990-1995 inkara Congress sawrkarah CBI hnenah general consent an lo pe tawh a, tumahin case an thehluh loh avangin miin an hrethiam tawk lo nia ngaiin sawrkar phalna lak ngai turin an dah leh ta zawk a. Kum 2007, MNF sawrkarah khan PRISM chuan CBI general consent an hmuh theih nan signature campaign an kalpui a, opposition MLA zingah tuna chief minister chiah hian a sign ve duh lo tih a sawi.
ZPM-in MLA inthlan campaign laiin CBI general consent pek an tiam nasa si a, tuna criminal law thar hi CBI general consent hnuhkirna hmanruaah an hmang ta niin a sawi.
Tun sawrkar chu thil zir chawpa kal an ni a, an inpalbuak nasat phah em a tih theih tih MPCC hruaitu hian a sawi. “ZPM sawrkar hian MNF leh Congress-in min beihrawn an ti thin a. Congress sawrkar lai khan MNF, ZNP, BJP leh party dangten min bei thin a, min beihrawn kan ti ngai lo. Tunah hian insawifiah term-ah kan awm mek a, an spokesperson pawh insawifiahna bak sawi tur a nei lo. Sawrkar kal tawh sawichhiata inawihnun an tum em ni tih ka zawt duh a ni,” a ti.
Congress party chuan an ti ang an tih chu an ti thin a. MNF-in thil tamtak an tiam a, an ti hlawhtling ngai lo tih a sawi. ZPM pawhin tamtak an tiam a, kan enthla mek a, mipuiin an ringhlel tan niin a sawi.