Congress Thalai-in chhawmdawlna hlan

Congress hruaitu Rahul Gandhi piancham pualin June 19 khan Indian Youth Congress (IYC) leh Mizorama Congress Thalai tangdun hmalaknain, Manipur buai avanga Zohnahthlak thahnem tak Manipur relief camp-a awmte tanpuina hlan a ni.
Tanpuina hi Churachanpur chhunga relief camp atana hman pahnih – Don Bosco Higher Secondary School leh Churachandpur College-ah te hlan a ni a. IYC leh MPYCC Relief Team hian chhawmdawlna an ken tam zawk chu Manipur Pradesh Congress Committee hruaitute kutah hlanin, an ni hian ruahmanna siamin relief camp hrang hrangah an sem darh ang.
Relief Team hruaitu Congress Thalai general secretary HP Lalchuailova chuan, Myanmar leh Bangladesh atangin raltlan engemawzat Mizorama an awm mek laiin, Manipur-a Zohnahthlakten kan duh loh leh mang lam pawha kan la man chhin ngai loh harsatna an tuar chu an uipui tuilian thlir liam mai mai thei loa, an tan Congress Thalai chuan theihtawpin hma an la zel dawn tih a sawi.
Tunah Churachandpur district huamchhungah hian relief camp 107 a awm mek a, mi 40000 chuangin an bel a ni. IYC leh MPYCC hian heng relief camp-a awm hmeichhia leh naupang kum tlinglo te bakah nu hnute hne lai mekte tana tangkai tur thahnem tak leh damdawi chi hrang hrang engemawzat an hlan a ni.
Manipur-a Zohnahthlak relief camp-a awmte chhawmdawlna pe tur hian IYC secretary Mizoram & Manipur in-charge Sarifa Rehman bakah Congress Thalai hruaitu engemawzat an kal a ni.