Congress treasurer-in banna thehlut

Mizoram Pradesh Congress Committee (MPCC) treasurer Zodintluanga Ralte, MLA-in Zirtawpni khan MPCC treasurer a nihna a\anga banna a thehlut a, mahse pawm a nih leh nih loh a chiang rih lo.
MPCC president Lalsawta a zin a, vice president Lal Thanzara’n treasurer lehkha thehluh hi Bhavan-ah a lo dawng tih thu dawn a ni. Treasurer hian amah kal lovin lehkha thehlut tur hian mi dang a tir tih thu dawn a ni bawk.
A lehkhaa a lan danin, an party kal danah committee thu ni lovin president thu angin an kal tih te, nomination committee din dawnin elected OB a ni chungin an rawn ve lo tih te, PAC koh pawh president-in tul a ti lo tih te, chung chu banna a thehluh chhan a nih thu a sawi.
Congress party chu committee thu-a innghat a ni a, chutiang chuan an lo kal thin tih sawiin, 2021-a MPCC president ni tan Lalsawta hunah an lungphum chu sawi nghin leh sawi chhiat a ni ta niin Zodintluanga chuan a sawi.
“Executive committee leh committee sang tak taka kan lo relho thin zawng zawngte pawh chu president-in mi pahnih khat lek rawnin thutlukna i siam ta fo mai a, collective leadership i lo sawi mawi em em thin chu a taka hmuh tur a awm ngai ta lo, chuvang chuan he treasurer post zahawm tak hi chelh reng thei niin ka inhre lo a, banna ka rawn thehlut ta a ni,” tiin a ziak.
“District Congress Committee elected office bearer post te pawh hi tihdanglam a lo ni fo tawh thin a, chungah chuan MPCC executive committee-ah rel hova, thutlukna siam a lo ni tawh thin a. President i lo nih hnuah erawh chuan Lunglei District Congress Committee siamrem a nih khan eng committee-ah mah relho a ni lo a. Nimin maia Aizawl District Congress Committee siamrem a nih pawh khan eng committee-ah mah relho a ni ta chuang lo a, hei hi Congress kalphung a ni lo a, committee rorela kal thin, hetianga mi pakhat duh dana kan kal hi kei chuan a tha ka ti lo a, elected OB te pawh biakrawn a, rorel a awm ngai chuang loa, hei vang hian he nihna zahawm tak hi chelh reng ka tan a rem tawh lovah ka ngai a, banna ka rawn thehlut a ni,” tiin a sawi zawm a ni.
Nomination committee din dawnin an rawn lo tih a sawi a, “Nomination Committee din a nih dawn khan member inruat chungchangah rawn ka ni lo a, member i duh ang i ruat hnuah telephone-in min hriattir ve lek a. Tunhnaia member pathum ruat belh an nih khan rawn ka ni lo a, ka hre lo hrim hrim a, elected OB ka nih zui zel hi a tulna awmin ka hre lo a, i sawi thin anga collective leadership-a kal a, inrawn tlan a awm tawh chuang lo a, chuvangin treasurer ka nihna atanga ban mai hi ka thutlukna a ni,” a ti.
An president-in PAC a ring lo niin a sawi a, PAC siam thar a tum nia sawiin, party rorelna sangin ngaih pawimawh a hlawh lo chu banna a thehluh chhan pakhat a nih thu a sawi.
“Kan party hotu thenkhatte tawngkam ka lo hriat danin Political Affairs Committee hi i ring zo tawh lova, PAC meeting koh pawh tul i ti tawh lo tih pawh mi engemawzah hnenah i sawi a. Tuna PAC member-te hi duhsak taka vice president leh president thlenga hlangkaitu che an nih avangin zah leh ngaih pawimawh an tul hlein ka hria. Chuti chunga i elected OB puite hriatpui lohva nangmah duhsak em emtu PAC member ni lai mekte thiat a, PAC thar siam i tum tih ka lo hria hi a lungchhiatthlak hlein ka hria,” a ti.
“|ha zawk nia kan hriat ve te ngaih pawimawh a ni lo a, chumi piah lamah party rorelna sang committee te ngaih pawimawh an ni tawh lo a, chuvang chuan he treasurer nihna zahawm tak hian tangkaina leh hlutna engmah a neih tak loh avang leh kan party chaknan leh inpumkhatna atana theihtawp chhuah ve kan lo tumna ten awmzia engmah a neih tak chuang loh avang hian treasurer nihna ka chelh zui zel hi a rem tawh lovah ka ngai a, banna ka rawn thehlut ta a ni,” a ti a, “Hei hi kan party chak zawk nan leh inlungrual tlanna atana ti ka ni e,” tiin a tawp a khar a ni.
MPCC president hi Delhi-ah a zin a, an treasurer lehkha thehluh pawh hi an ngaihtuah rih lo tih thu dawn a ni.