Congress zuiin Tamil Nadu-ah IUML-in DMK kalsan

Tamil Nadu-a Dravida Munnetra Kazhagam (DMK) kaihhruai tangrual pawl chu Congress-in kalsana Tamilaga Vettri Kazhagam (TVK) thawhpuia sorkar an siam hnuah Indian Union Muslim League (IUML) pawh tangrual pawl, Secular Progressive Alliance (SPA) an chhuahsan veleh ta.
Tun hnaia assembly inthlan result a chhuah hnu khan Congress hian DMK kaihhruai tangrual hi kalsanin Vijay-a kaihhruai, TVK thawhpuiin sorkar an siam a. thu an sawi a, an state-a politic-a tanna inthlakna lian ber pawl a tling.
A hnu lawkah IUML hian SPA chu an chhuahsan veleh a, inthlan awm zel turah erawh an tangho dawn em tih erawh by-election leh tual chhung rorel khawl inthlan hun tur puan a nih hnuah thutlukna siam a nih tur thu a sawi.
Inrinnia Chennai-a party general council meeting neihah IUML chuan resolution 14 an pass a, heng zingah hian DMK kaihhruai tangrual pawl nena inzawmna tihtawp pawh a tel.
IUML President K M Khader Mohideen-a Tamil Nadu assembly-ah an member pahnihin hmun an chang a, hei hi DMK kaihhruai tangrual zar a nih thu a sawi a. “TVK-ah hian thlawp hian eng intiamkamna mah a awm lo va, thlawp tura kan thutlukna siam chhan awmchhun chu Tamil Nadu-ah President’s Rule hman a nih loh nan chauh a ni,” a ti.
TVK hian assembly segment 108-ah hnehna chang mah se sorkar siamna atana seat 118 an neih a ngai a. Assembly seat nga latu, Congress atangin thlawpna a la a, CPI, CPI (M) leh Viduthalai Chiruthaigal Katchi (VCK) leh IUML atangin seat hnih theuh thlawpna an nei ta bawk.
Inthlan result puan a nih hnuah eng intiamna mah awm lovin TVK sorkar thlawp turin thutlukna siam mah se IUML MLA A M Shahjahan chu minorities welfare minister atan lak luh a ni.
Thil thleng chungchangah DMK thupuangtu, TKS Elangovan chuan, “IUML an inhnukdawk a, cabinet minister pawh an nei tawh a. Engtin nge kan tih theih ang? Quaid-E-Millath hunlai atang khan IUML nena kan inzawmna chu a rei hle a, tunah chuan, an inhnukdawk tawh avangin eng nge kan tih theih ang?” a ti.