Conor McGregor-a’n rape case-ah thiam chang zo lo

Conor McGregor-a’n rape case-ah thiam chang zo lo
Irish mixed martial artist Conor McGregor chu hmeichhe pakhatin pawngsuala a puhnaah thiam loh chantir a ni a, court-in dollar 2,50,000 chawi turin a ti.
Nikita Hand chuan 2018 khan McGregor-a’n a pawngsual bakah kut a thlak nual niin a puh a, he pawngsual thubuaiah hian High Court of Dublin jury te chuan McGregor chu thiam loh a chantir a, Nikita Hand chuan jury te thutlukna chu lawmawm a tih tu sawiin, courtroom pawna reporter te hnenah a hnehna chuan hlau leh khur chung pawha thil tha lo chu ngawihbo pui mai lova, au chhuahpui ngei tur a nih zia a tilang niin a sawi.
McGregor erawhin Nikita Hand chungah hian a duh lo chungin engmah a ti lui lo niin tan a khawh ve thung a, Dublin hotel-a penthouse-ah an pahniha duthlanna ngeia awmdun an nih thuin tan a khawh ve thung a, jury ten evidence zawng zawng an ngaithla kim lo chu pawi a tih thu sawiin, “Tunah chuan kan chhungkuain kan awm a, ka hmalam hun atan ka insawrbing ang,” a ti.
He civil court case hi tun thla tir atang khan an rel tan a, Nikita Hand chuan McGregor hian 2018-a an intawnnaah hian a hrawkah vawi tam tak a rek niin a sawi a, hetianga a reh lai hian, “tikha chuan octagon chhunga vawi thum ka tap out-na chhan i hrethiam tawh ang min ti,” tiin, McGregor hian Ultimate Fighting Championship-ah a chak loh chungchang te pawh a tarlang.
Hand chuan, “Min kaltir leh dawnah pawh ‘ka tihpalh’ tih te ka sawi ka la hria. Thil ka tisual niin ka inngai a, min tihnat leh tawh loh nan chu thil thleng chu tuhnenah mah ka sawi chhuak dawn lo tih hriattir ka duh vangin,” a ti bawk.
McGregor hi 2008 atanga a lo chenpui tawh, a kawppui Dee Devlin-i’n he case-ah hian a support reng a, McGregor chuan Nikita Hand chuan dawt a sawi tiin, an mutdun laiin an che nasa a, mahse, a nawr lui lo a, a che rawva lo niin a sawi a, “A duh loh thu leh ti lo turin vawi khatmah tan a khawh lo,” a ti ve thung.
McGregor hian zahmawh rawngkaia che rawva deuha puhna hi a vawi khat tawnna a ni tawh lova, 2023 khan hmeichhe pakhatin NBA Finals khelhna, Miami Heat game-ah bathroom chhungah McGregor hian zahmawh rawngkaiin a nawr lui chiam niin a sawi a, mahse, evidence a awm tha tawk lo tiin Miami State Attorney Office-in a hnawl sak ta a ni.