Olivia Newton-John thil hlui an lilam dawn

Olivia Newton-John thil hlui an lilam dawn
Julien’s Auctions leh Turner Classic Movies chuan actress leh singer chatuan ram pan ta Olivia Newton-John thil hlui te lilamin, chuta an sum hmuh chu charity-ah an chhung lut dawn. Lilamna hi December ni 10 atanga ni 13 thleng, Waldorf Astoria Beverly Hills-ah an nei dawn a, Julien’s Auctions website-ah online-in an kalpui bawk ang.
He lilamnaah hian Olivia Newton-John thil hlui 400 chuang an lilam dawn a, a thawmhnaw hlui, instrument, tlereuh leh a mimal thil chi hrang hrang a tel dawn a, chung zingah chuan 1978 classic film ‘Grease’ a Sandy Olsson lema a channa a a leather jacket hak a tel a, hei bakah hian ‘Summer Nights,’ Physical’ leh ‘Have You Never Been Mellow’ record award te, 1974-a American Music Award a favorite country female vocalist a dawn te, Dolly Parton nena ‘Jolene’ an sak dunnaa music video-a a kawr hak leh a piano hlui te pawh a tel ang.
He lilamnaa an sum hmuh thenkhat chu Olivia Newton-John Foundation Fund-ah chhun luh a ni dawn a, he foundation hi Newton-John leh a pasal John Easterling ten an din niin, cancer enkawl nana ramhmul damdawi lama zirnain hma a sawn theih nana charity a ni. Newton-John hi August 2022 khan kum 73 mi niin a boral a, hnute cancer avangin hun rei tak a lo inenkawl ve tawh a ni.
Grease-ah hian Olivia Newton-John hi John Travolta nen an chang dun a, a hunlaia khawvel huap pawha film hlawhtling ber te zinga mi a ni.