Consumer Khawvel PLUS MRP Movement

Lallunghnema
Charity Lodge
Cont: 9862288182

Chhiartute chibai tha ber ka bûk a che u.
In thil lei leh service chi hrang hrang in leina a buma in awm loh nan invêng fimkhur rawh u.
He Consumer Huang chhiartute hnen atang hian thurâwn tha tak tak ka dawng thin a. A lawmawm ka ti hle. In thurâwnte hian min fuih phur a, min tichak bawk a ni.
Chawlhkar hmasaah khan ka tawnhriat thenkhat tarlangin consumer huaisen hlawhtlinnate ka rawn sawi a. Hetianga an thil leia harsatna nei consumer-te ka buaipui thu ka sawi hian mi engemaw zatin an lo hriain zirtirna tha tak a ni a. Insawi theihna a ni lo va. Mahni infak mawina lam a kâwk hek lo. Consumer-te hlawhtlinna hi intih hmuh a tul e, ka tihna mai a ni. Mi thenkhat chuan complaint tur nei mah se, an intihbuai peih thin loh avangin sum tam tak an chân phah thin a ni. Mi tam tak chuan an thil leina a harsatna an tawh te chu consumer hotute an hrilh a, mangang âwm takin an zualko khum thin a ni. Mahse, mi thenkhat chuan kawng thui an zawh hmâin an ngawih bo san leh ringawt thin a. Hetiang mi hi hmuh tur an awm reng a ni.An ngeiawm duh khawp a ni. Hetiang consumer dawizep, rilru mumal pu lo hi ka tawng fo mai!
Hmanni lawk khân Mizorama sumdawng lian Entrepreneur Inkhawmpuinaa tel ve tura sawmna ka hmu a. Min sawmna thu chu, ‘Lo tel duh in awm tâkin aw, A pui dawn a nia’ tih a ni. He sawmna thuziak chungah hian ‘Mizoram Entrepreneurs’ Conference thu hla tarlan a ni a. Sawmna pawm dan thiam harsa tak a ni, ka tih avangin kei chuan, “Min sawm tak tak ula, in customer-te hi consumer kan ni a. Kan pawimawh khawp asin. Consumer Khawvel a ni zel” ka han ti fiam vel a. Ani, kan nau chuan, “Kan sawm tak tak che alawm” a tih takah chuan an programme a han inlan ve ka chak ta deuhva.
He kan thukhawchâng atang chuan ngaihtuahna thui tak ka nei nghal a. Chu chu consumer-te ruhrel lenzia hi a ni. Consumer-te khawvel hi khawi pawh a ni zel mai. Consumer-te tel lo chuan eng mah hi a puitling thei lo a nih hi ka tih phah ta hial a ni. Mahse, ngaih pawimawh an hlawh si lo! Thil siam leh deh chhuahte, thar chhuahte leh hralh chhuahte tawpna chu consumer-te hi an ni.Siam chhuaktute innghahna chu consumerte hi an ni a, an ni reng dawn a ni. An pawimawhzia hi hai rual a ni lova, kan hai lawi si! Ziaktu pakhat chuan ‘consumer-te ngaih pawimawh lohna hmun apiangah economy a tlu chhe thin’ a ti a ni.
Chuvangin ram economy siam that a nih dawn chuan consumer-te zalenna kawng sial a ngai a. Consumer Right hi kan chawi len a ngai thin a ni.
Sumdawnna hlawhtling chu consumer kawng hawn nen lak hran theih a ni lo. Consumer-te lalna hmun apiangah mipui an zalen a, an hlim a, sumdawng leh dawrkaite pawh an hlawhtling thin a ni.
Hmanni lawk khan kan thian pakhat chuan khaw pakhata consumer awareness programme hmanpuiah min sawm a. He khuaah hian dawrkai ten maximum retail price hi an la ngai pawimawh lo hle a ni âwm e. Chutih laiin khawtlang hruaitute leh mipuiin MRP chu an lo ngai pawimawh hle si a. Hetiang boruak karah hian consumer right awareness neih tul hlein an hre si a ni. MRP bawhchhiat piah lamah thil man chhiar tona hmun a niin consumer-te chu he khuaah hian an chêp hle a ni.
Centre For Consumer Education chuan Consumer Outreach Programme hi Aizawl khawpui hmun hrang hrangah an lo nei tawh a. Chung an thiltihte chu ram mipui te lo thlir turin TV-ah puan zara tihlan a ni.
Chu chu he khuaa mite hian an lo hmu a. Maximum Retail Price zawm that leh that loh leh MRP bawhchhiat chungchangah han campaign turin min duh a ni a. An thahnemngaihna a ropui hle a ni.
MRP aia sanga thil kan lei hian thil hralhtuten leitute chu min rawk a, kan sum min chhuksak a ni. Chuvangin thil leitute hi kan than harh a hun ta tak zet zet a ni e.
Tun lai hian MRP ngaih pawimawhna a lian ta riau maiin kan hria a. Kei phei chuan MRP Movement a intan ka ti hial a, mi tam takin an hre bawk a ni.
Nu pakhat dawr nghaktu ngam tlak tak ka nei! He nu nen hian kan inhnial fiam chûl mai! tum khat chu!Kei ta pek chuan, “Engatinge MRP aia sanga in biscuit zawrh lai in hralh? ka ti a.
Ani chuan, “Kha en ta che. A man zat a inziah reng kha! En chiang ta che!” min ti ta erh mai a. A nuihzat thlâk a, a lawmawm hle bawk a ni. He nu hian MRP aia sangin an dawr bungrua a hralh ngai lo! Rinawm pangngai tak chu a ni. Kristian thaah ka puang! Hetiang ngaihtuahna Mizo thil zuartute thinlunga lo piang ta hi consumer pawl leh activist – te thawh rah a ni. Mahse, a la dik tawk lo, MRP AIA HNIAM A NI TUR A NI. Mizoram pawnah chuan MRP movement hi a intan daih tawh a ni. Keini Mizoram hi chu state dang hnungah kan la tei mai mai a nih hi! Hei hian kan thu leh hla ka titawp duh.

Consumer-te hi Lal kan ni!
Chawimawiin kan awm si lo,
Consumerte chu tih retheihin kan awm a,
Kan au chhuak ngam si lo.
Consumer-te chu nêk sawrin kan awm a, kan phun ngam si lo.
A va na em!

Aw le! Consumer-te tana Dan rangkachak chu Consumer Protection Act 2019 hi a ni. Politician leh cian lo te hriat mâkmawh chu!