Consumer khawvela ka chêt velna thenkhat Plus

Bank pahnih Rs. 52,659
(+10 % interest) Chawitir thu

Lallunghnema
Charity Lodge
Cont: 9862288182

Consumer huang  min lo hlutsaktute in za vaiin chibai ka bûk a che u.
Kum chanve kan hmang zo ta reng mai! Kum chanve dang kan hmang tan leh ta reng bawk! Dam leh hrisel tha pângngaia awm hi chuan nî hi a liam zung zung a,hun a kal duak duak a. Nî te hi rei lovin kan hre thin. Keini ang hunbi neia thuziak thin tan phei chuan a rei lo thei khawp mai. Hetianga hman hlel taka ka awm avâng  hian buai viau thin mah ila,ka lawm tlat  thin a ni! Ka lawmna tak zawk chu Consumer thil buaipuia ka awm thei hi a ni a, ka han ngaihtuah chang hian ka lawm veng veng zu nia maw le?
       Tunlai tak hian Consumer khawvela  ka thil tih  nêp tê tê ka ziak chhuak mai mai a. Eng eng emaw hi ka ti kûr zut a, hlawhtlinna mual mual pawh ka nei ve bawk. |hang khat lian zêt zawt Consumer thil ka lo buaipui ve ta reng mai! Hma pawh ka thawhpuite nen kan la chho ve reng. Tunlai taka kan hmanraw nghet tak pakhat chu Consumer WhatsApp Group hi a ni a. Kan sawi tawh thin angin 1024 kan awm reng a. Consumer thil kan in share-ho thin a. Member-ten kan hlawkpui viauin ka hria a ni.
            Kum thum (3) vel kal tâ-ah khan Consumer You Tube Channel ka siam ve ngawt pek  a. Chu chu ‘Consumer-te Chanvo hriatna’ tih a ni a. Subscriber 833 zet ka lo nei hman a. Rokhawlhna eng eng emaw avangin ka tâwp san a. Mahse, tunah hian min pui duhtute zarah thar thawh leh ka tum  mêk a. Eng tak ang dawn i maw?
Lehkhabu ziah hi  a buaithlâk viau nâin ka insûm thei lêm lo. Consumer bik atan bu riat(8)- na ka puahchah leh mêk chu a ni a. A huphurhawm hle thin! Mahse, kumin chhung ngeia  mipui chhiar theih tura tlângzarh hman hrâm erawh chu ka tum a ni. Article ziah pawh hi “taima hna a ni,” an ti thin! Mahse,ka la ziak chhunzawm zel chu a  ni a. Ka theihna (strength)-in a tlin tâwp rât thlengin ka ziak ang. Ziak fung thlah ka tum lo bur! Mahse, Pathian thu thu, ka ti zêl ang.
 Tun hnâiah  Consumer Outreach Programme hmun hnihah Centre For Consumer Education chuan kan nei a. May thlaah khan Lailên Consulting Private Limited Office, Tuikhuahtlangah kan nei a. |halai eng emaw zat pung khawm hmâah Consumer Right kan sawi a. Leaflet kan sem bawk a. Leaflet hi Lailên  hotupain  min tlangzarhsak a ni. June 20 khan  Dawrpui phei, Zion Street velah hian Legal Metrology leh Centre For Consumer Education tangkawp chuan Consumer Outreach Programme hmangin  MRP Survey  kan nei a. Dawr thahnem tham tak kan fang a. Rah duhawm tak a chhuah zêl khân beisei. Hun remchang hmasa berah anniho nen hian feh chhuah leh kan tum a ni. Hemi tum hian Dan hre mi leh Kohhran Upa pakhatin min ho thei bawk a, kan phuisui phah hle a ni. Mipui lam pawhin MRP awareness-ah hian hma kan sâwn  tawh hle niin hriat a ni.
     Chhiartu duh tak, vawiinah hian Consumer Awareness atan Bank pahnih Rs.52,659/- ve ve   lawih chawitir an nih thu ka ziak duh a. He thil thleng hi khu lam vai rama lama mi  a ni. Times of India (25/5/2025)-in a tarlang a ni.
     An tih dan phung pangngaiin Bank pahnih hmanga Health Insurance policy titu pakhat kum 69 mi Mr Vanga  Krishna Reddy chuan  Online policy - tiin Rs.52,659 chu lâk chhuah a tum a. Mahse chhut sual (typo) avangin account dangah a lut hlauh mai a. He thil kal sual tih a  hriat veleh Bank-ah chuan kalin thil thlen dan chu a va sawi a. Mahse Bank-a thawkte chuan an lo ûksâk tha duh lova. Bank hna thawktute chuan, ‘Customer  cannot be contacted for obtaining debit confirmation,’ tih chu an chhuanlam  a ni.
Mahse, Bank thawktute chhan danah hian  Krishna Reddy chu a lungawi thei ngang lova. Tichuan, a lungawi lohna thawi dam a nih theih nan leh a dikna hai lan a nih theih nan Ranga Reddy District Consumer Disputes Reddressal Commission (Hyderabad)hnenah Complaint a theh lut ta a. Consumer Commission chuan Consumer Protection Act, 2019 sec. 2(11) ‘deficiency in service a ni tiin heng Bank pahnihte hi Rs.52,659 ve ve chawi turin Judgement a ti chhuak ta a ni. He thu  ka rawn tarlan chhan hi thil dang a ni law, Bank dawrtu (customer) te hi consumer  an ni a, dikna leh chanvo (right, justice)an nei, tih hi a ni. Mizoramah hian Bank chi hrang hrang  a tam hle a. Ni tin dawrtu an ngah êm êm reng a. An Customer-te hi an tân an hlu êm êm a, an chunga that chhuah hi Bank hnathawktute mawhphurhna a ni tih ka sawi duh a ni. Bank hian customer an mamawh a. Customer ngah apiang hi Bank hlawhtling an ni a. Customer leh Bank-a thawkte hi inring tawn kan ni a. Intanpui tawn tur kan ni. Hei hi ka sawi nawn leh duh - Bank dawrtute hi dah pawimawh ber tur an ni; ‘Lal’ an ni si a.
Mipui mamawh ber chu Consumer right hriatna kawnga harh chhuah hi a ni.
Chawlhkar leh lamah kan titiho leh dawn nia. Ni thar, ni tha, i tan!