Consumer Right Kohhran Thalai zingah : Tun hnaia ka message dawn thenkhatte

Lallunghnema
Charity Lodge
Cont: 9862288182

Consumer Huang min lo hlutsaktute chibai ka buk a che u.
Keini’n thahnemngai taka kan ziah laiin nangni’n taima takin in lo chhiar thin a. In lo tangkaipui thin bawk tih ka hriatin ka lawm hle thin a ni. Tirhkoh Paula tawngkam takin ka lawmna tizualtu lo ni rawh u.
Kan hna ve hi ka han ngaihtuah thui deuh chang phei hi chuan ka ning lek lek thin. Hmanni lawk khan Synod Bookroom-ah ka va tei-hawi a. Ka lehkhabu Consumer-te Zalenna hralh chhuah dinhmun (sales position) chu ka va ngaihven e, ka ti a. An lo hralh tlêm hle a. Lehkhabu hralh kal lo pawl niin ka hria. Kum khat hnuah ka account ka va en ve kha a ni a. Eizawn nan hmang ta ila, ka lehkhabu hi hralh a tlak loh em avangin chaw ngheiin vawi tam ka thi mai âwm mange aw, ka hial a ni. Pawisa nei lovin ka let nilêng thak thak ngei bawk ang. Mahse, ka zam love, Consumer Activist-te thlirna tukverh atang erawh chuan Consumer Right hi mi tin mamawh a ni tlat si! Ka Lehkhabu lei tlem te pawh khan an hman tangkai ngei pawh ka ring a ni.
‘Lehkhabu hralh kal lo, chhungkaw tin mamawh’ tiin ka insawh ka insawh a. Mahse a sawt chuang lêm hlei lova. Heti chung si hian Consumer kaihhnawih hlang lehkhabu pasarih ka ziak tawh a, tunah hian pariatna ka puah leh mek a ni a. Article pawh za eng emaw zat chu ka ziak ta thova, ka ziak mek bawk. Ni tin chanchinbuah te chuan chawlhkartin article ka thawh zel tho bawk. Chhiartu kan tlachham lova, lo tangkaipuitu an awm zel te hi ka lawmna a ni. He lam hi chu kan duh tawk tawh ang.
Tunlai hian Food Civil Supplies & Consumer Affairs Department – in thahnem ngaihnain Consumer Awareness Programme hmun hrang hrangah kan nei thin a. Thu pawh ka sawi mawlh mawlh mai. Pawl hrang hrang ten Resource person turin min sawm a. Consumer right Awareness Programme hlawhtling tak kan neiin ka hria a ni.
October ni 26 Pathianni Chawhnûah pawh khan Baptist Church of Mizoram, Salom, |halai Kristian Pawl Unit nen an Kohhran Hall, Mission Vengthlangah Consumer Right Awareness kan nei a. Maubawk KTP leh Republic Vengthlang TKP- te Consumer Right Awareness campaign programme kan lo nei tawh bawk a. Young Mizo Association Branch thenkhatte nen hun hlimawm tak kan lo hmang tawh bawk. Heng Programme chhimtu thalai rual thahnem tak hmaa hetiang hun ka hmang thei hi lawmawm ka ti hle a ni. |halai rual zinga thusawi tur ka nih avangin ka intuai hnûm ve hle a. Ka sam (hair) chu ka han ‘dyed ‘ ve ngawt a. Nalh leh tha thei ang berin ka inthuam a ni ber e. Ka thusawi chu an hlawkpui ngei ka beisei. Thu ka sawi rei lova, muthlu hmel pawh ka hmu lo. An ngaithla tha thawkhatin ka hre bawk . Consumer Leaflet (red paper) sem a niin Consumer – te Zalenna bu 2 ka present bawk a. A thu hrimin thusawi piah lama Leaflet kan sem kha chhiarin ‘khâl’ se thatpuina tham chu a ni hrim a. An nitin nun hruaitu atan pawh tha viauin ka hria a ni. Consumer – te Dikna leh Chanvo hi sawi tawk a awm thei lova, kan sawi ang a, kan ziak zel bawk dawn a ni. Mahni chanvo hre lo, hnam tla bal nih hi awm thei a nih avangin hetiang Consumer Right kan sawite hi taima leh rinawm taka zir chu kan bat a ni. Sawrkar Laipui phei chuan kum tinin pawisa a thehchhuak thin a. Chuvangin sawrkar hi a insen thlawn loh nan keini Khua leh Tuite hian kan lo dawngsawng tha tur a ni a. |hahnemngai takin kan inzirtir chu kan mawhphurhna a ni.
Tun hnaia Consumer Complaint ka dawn te hi, a then chauh ka han sawi lawk teh ang.
Job fee – petuten harsatna an neih thuah tanpui an ngaihzia min hrilh a. Mizoram pawn mai ni lo, khawvel hmun hla zawkahte chuan Mizo thalai tam takin hna an thawk a. Hengte hi hna zawnsaktuten hna an lo zawnsakin an hmuhsak thin a. Fee pawh eng emaw zat an laksak thin a ni. Hetih lai hian heng Employment Agent – te hian pawisa laksak a, hna hmuhsak loh an nei a ni chek ang chu, complaint ka dawng ta tlat a ni. Hetiang thil fel lo hi Unfair Trade Practice a ni.
Nu pakhat chuan India Hmar lam, Jammu & Kashmir-a a naute chu Postal Department Services (Speed Post) kaltlangin thei (dragon fruit) eng emaw zat a thawn a. Speed post hi thawn ni (date) atanga dar 48 (hrs) chhunga a thlenna tur thleng tura ngaih a ni. Mahse chung an thei (fruit) thawn chu ni 15 hnuah pawh a thawnsak a te chuan an la hmu ta lova. An hmuh meuh chuan thei (fruit) chu a lo chhe hman der tawh a ni. An lungawi lo hle.
Nov.4 khan kan thianpa chhungten Complaint an nei a. Alluminium Window Frame cheng nuai eng emaw zat man chu nikum (2024 Oct) khan an lei a. Tunhnai thleng khan delivery a la tihsak thei lo. Pawisa laksak tê tê a, bungrua pêk leh si loh hi thil serious tak a ni a. Unfair Trade Practice leh Deficiency in Service a ni a, Consumer Protection Act 2019 bawhchhiatna a ni a. Consumer Commission-ah khin theih a ni. Amaherawh chu inkhin buai kher ngai lova inrem hi a tha ber. Chu chu a Kristian êm êm a ni.