Krismas vs Halpuah

Kumin Krismas leh kumthar vuakveta puak thei thil halpuah, halmawi leh a kaihhnawih khapna siam leh a kenkawh dan tur relin nimin khan Lawngtlai DC hovin an thukhawm a.
Kumin September chawhma lam khan hemi chungchangah hian home minister hovin an lo thukhawm tawh bawk a. Hun pui thlen hma thla thum vel atanga inbuatsaihna kalpui tan tawh kha a ni a, kuminah chuan kum dang aia halpuah/halmawi khapna thupek bawhchhia an tlem sawt turah beisei ta ila.
Nikum khan hun pui laia thupek bawhchhiaa halpuah leh halmawi hal lui mi 55 thubuai siamsak an ni a, heng thubuai kaihhnawiha bungrua man khawm chu cheng nuai 24 chuang hu a ni.
Halpuah leh halmawi hal avanga hun pui laia boruak thianghlim lam tehna Air Quality Index chu 2023 Dec 31 zan khan 597 a nih laiin 2025-ah chuan 115 a ni a, hma kan sawn hle. Kuminah hian Krismas laiin halpuah/halmawi hal hi kum dang ang bawkin an awm lo tura beiseina a lian hle a, amaherawhchu, Dec ni 31 zan erawh, a huphurhawm ru ang reng leh hle a, mahse kum hmasa ai chuan hma kan sawn hret turah a beisei theih awm e.
“En teh, a lo her chhuak dawn ta, mi tin tana hlimna tur chu…” tiin Krismas leh Kumthar lo thleng tur hmuahna hla an lo phuah a, nghakhlel takin he hun pui lo thleng tur hi kan thlir thin a nih kha.
Tunah chuan hun pui lo her chhuak tur nghahhlelh aiin huphurhna a lian zawk ta em ni aw a tih theih ta. Krismas a lo hnaih apiangin ‘halpuah’ a lo lang a, Krismas hmuahna lam aiin Halpuah hmuhna lamah kan inbuatsaih nasa zawk hial ta awm e.
Nasa taka kum tam tak kan do hnuah, Krismas hmuah nana halpuah leh a behbawm hal vak vak ang kha chu a ziaawm ta hle a; mahse, kumhlui thlah leh kumthar lawmnaah erawh uar takin halpuah/halmawi kan la hal chhunzawm zel a. Kuminah hian, kum dang aiin halpuah/halmawi hi a nep deuh turah a beisei theih ang a, a chhan pawh hun pui lo thlen hma thla thum vel atanga lo urlawk tawh a ni a, inbuatsaihna tha tak awm turah a beisei theih awm e.
Mi tam tak, hriselna leh taksa lama harsatna hrang hrang neite tan chuan, hun pui lo her chhuak tur hi nghahhlelhna aiin huphurhna a lian zawkin a rinawm. Halpuah/halmawi hian boruak chhia (air pollution) a thlen rualin, mihring rilru nawmlohna a thlen bawk a, minute rei lo te mit tlaina thlentu hian a hnu lamah hun rei tak chhiatna leh harsatna a thlen thin avangin, kan tanrual a pawimawh hle a ni.