Contract agreement tha lo vangin kawng thawmthatah buaina awm – ZPM thupuangtu

Mizorama kawngpui siam a nihin, sawrkar leh contractor inkara inremna/ intiamkamna thu dah danah tih fel tawk loh a awm thin avangin kawng chhia thawmthat kawngah harsatna a awm phah a, hei hi chief minister chuan siamthat a duh tih ZPM thupuangtu K Laltluangkima chuan a sawi.
Tunhnaia kawng chhia thawmthat ngai thawmthat a nih loh chungchangah hetiang, contract agreement fuh lo hi sawrkar leh mipuiin an tuar ta chiah tih ZPM thupuangtu hian sawiin, Kolasib district Bairabi – Bilkhawthlir, Bilkhawthlir – Kolasib, Kawnpui – Khamrang inkar siamtu Sadguru Company hian contract agreement ziah fel hun tur atangin dan an bawhchhe nasa nghal a, performance security pawh EPC contract agreement danah chuan contract amount atanga 5% dah tur tih ni si, 3% chauh an lo dah a. 5% dah se Rs. 58,95,000 tur a nih laiin, tunhnaia sawrkarin a laklet Rs. 35,37,000 chauh an dah tih a sawi.
Kawnpui to Khamrang kawngah hian Sadguru hian hna an zawh ni, completion sertificate 2022 May 6-a pek atangin kum 3 chhung (2025 May 6 thleng) ‘defect liability period’ enkawl zui a, a chhe lai thawmtha thin tur an nih laiin, hemi chhunga kawng siam nana sum awm an dah zat chu nuai 12.54 chauh a ni a, a tlem chhan chu, kawng repair-na atana hman turin contract agreement-ah “contract amount atangin 1% chauh a ni ang” tia PWD rawt anga an lo dah vang a ni tih a sawi a ni.
“Heti zat lak sum an dah hi chief minister-in tlem a tih thu a sawichhuak a. MNF general secretary Pu K Lalsawmvela chuan a sawi dan a hrechiang lo nge, thudik tawk lo sawiah CM hi a puh ta daih a ni,” K Laltluangkima hian a ti.
Defect liability period pawh hi EPC contract agreement-ah hian duh zawk zawk thlan theih ang deuhin kum 5/ kum 3 tih a chuang a, hengte hi chiang faka ziah a nih loh vangin Sadguru hian kum 3 zawk a thlang mai nia a lan thu a sawi bawk.
Kawng thawmtha tura tih an ni chu run dal chauha tiin, thu an awih loh avang hian show cause notice pawh pek an ni a, notice pawh hi an chhang ngai lo nia sawiin, “Chutiang a nih takah chuan Mizoram sawrkar chuan Regional Office MoRTH, Guwahati office hriatpuinain Sadguru hna chu kumin September 4 khan cancel turin thutlukna a siam ta a, Sadguru pawhin sawrkar an khin zui zel loh nan leh sawrkarin a khinzui loh nan an contract tihtawp sak (foreclose) an lo dil ve bawk a, inhrethiam tawnin performance security Rs. 35,37,000 chu Mizoram sawrkarin kawng siam nan a laksak (forfeit) ta a ni,” a ti.
FCI buhfai phurhna, Bairabi to Bilkhawthlir pawh Sadguru hian 2026 September 29 thleng a enkawl zui tur a nih laiin, leimin tlem a paih tih loh chu kawng thawmthat hna thawh a nei loa, sawrkar chuan kumin March 4 khan contractor hi show cause notice a pe a. Contractor hi hrem dan dang a awm bawk si loa, thawhzui a tum tawh loh avangin contract hi tihtawp sak niin, performance Security nuai 49 pawh laksak an ni tih a sawi.
Sadguru enkawl tur hun chhung a zawh hnuah NHIDCL kuta hlan tur a nih laiin, hemi hun hi a la tawp loh avangin NHIDCL hian a la duh bik si lo va. Kawng chhia vangin mipuiin kan tuar tawh bawk si a. State PWD mawhphurhna a ni lo chungin, sawrkar chuan ama sum sengin a siamtha ta ngawt mai tih ZPM thupuangtu hian a sawi bawk.
Zawhna chhangin, Mizoram sawrkar chuan tunah chuan thil dik leh awmze neia rorelna kalpui a tum tawh a. Tun tuma kawng chhia bak hi ZPM sawrkar chhungin kawng chhia a awm leh tawh dawn lo tih a sawi a ni.