Contract-in nurse 40 kan la dawn – Health minister
Mizoram Government Nursing Service Association (MGNSA) chuan Ningani khan conference vawi 23-na an hmang a. Kumin conference thupui atan “Soft Skill for Nurses” tih hman a ni.
Khawmpui hmanpuitu Health minister Lalrinpuiii chuan, Mizoram sawrkarin nurse pawimawh zia hriain, an indaihlohna phuhru turin 2025 April-a Mizoram Universal Health Care Scheme tlangzarh a nih dawn khan nurse 300 chuang lak a nih bakah a nghetin nursing officer 10 lak an ni tih a sawi. Health & Family Welfare hnuaiah contract-in nurse 40 lak an ni leh dawn a, senior nursing officer pawh 10 lak thuai a ni dawn tih a sawi a ni.
Nursing school lamah tutor post 9 leh warden post 1 atan MPSC written exam result nghah mek a nih bakah Nursing College lam atan assistant professor post 5 advertisement nghah mek a ni, tiin, “Sawrkarin vawi leh khatah indaihlohna phuhru thei lo mah se, hmasawn zel turin hma lak a ni,” a ti.
Civil Hospital Aizawl tichangtlung tura sawrkar hmalakna minister hian a sawi a. Cath lab dah thar a ni a, MRI khawl bakah bungraw chi hrang hrang dah a ni a, mipui chhiah tlingkhawm ‘cess’ atangin Artroscope khawl thar cheng nuai 120 man lei a ni a, kal thlak pawh tih tan thuai tum niin, inzaina bungrua lei mek a ni a, thawktute pawh a bika training turin Kolkata-a tirh an ni tih a sawi. Power supply khaihlakin Civil Hospital a tihbuai lohna turin VIP line zamna tur sum leh oxygen pump khawl tha man tur pawh sawrkarin a pe tawh tih a sawi bawk.
ZMC&H lamah cardio- thorasic surgery ti tura inbuatsaih felin, thawktute training neiin PGI Chandigarh-ah an kal tawh a; CT Scan thar hawn fel niin, Siaha leh Champhaiah CT Scan dah thar a ni a; oxygen plant thar neihna tur sum sawrkarin a pe tawh a; Mamit District Hospital building thar luahluh mai tura peih tawh niin, Serchhip, Kolasib leh Hnahthial District Hospital sak mek a ni tih a sawi a ni.
MGNSA conference-ah hian National Florence Nightingale Award dawng mi pahnih – V Lalhmangaihi (nursing officer) leh H Mankimi (senior nursing officer) bakah hruaitu hlun Lalhmingmawia Thangluah (nursing officer) hnenah chawimawina hlan a ni.