Oil-a cess lak titawp turin kan ngen – MPCC treasurer

ZPM sawrkar chuan mipui a lainat a nih chuan oil-a cess a lak chu titawp turin an ngen tih Congress hruaitu Dr Lalmalsawma Nghaka chuan a sawi.
Thuthar thehdarhtute a kawmnaah MPCC treasurer Dr Lalmalsawma chuan, khawvela oil man sang zelin crude oil lalut nasa India ram pawh a nghawng na a, hnathawk tura kal velna leh bungrua phurh man sang zel chuan rupee hlutna tlahniam zel chuan ram chhungah fuel man a tisang zual zel bawk. Chu chuan inflation tisangin, ei leh in, nepnawi, delivery leh public transport thlengin a tisang nghal zel tih a sawi.
“Heng harsatna laka mipui chhanchhuah hi mipui mawhphurhna a ni loa, thlan lal sawrkarna chelh mekte mawhphurhna a ni,” a ti.
Tunhnaia state panga leh UT inthlan zawh chiah, state pathuma BJP an chak hnu in, petrol leh diesel man vawi 4 tihsan a ni a, Rs. 8 dawnin kar hnih chhungin a sang hman a, oil man tihsan avang hian khawpui hrang hrangah petrol litre-ah Rs. 100 a chuang hial tawh tih a sawi a ni.
Hemi kaihhnawih zel leh BJP kaihhruai Prime minister Modi economic policy vangin India economy chhe sa tawh nen, India dinhmun leh a pawisa hlut a tlahniam hle tawh a, kan enhniam zawk thin Pakistan leh Bangladesh pawisa nen a hlutlam a intluk deuh thuak tawh a, US dollar khat leh India cheng za a inhen thuak a, economy dinhmun tha zawk ram dangte pawisa lakah pawh India rupee chuan a hlutna a hloh duai duai tih MPCC hruaitu hian a sawi.
Hetiang karah hian Mizoram sawrkarin petrol leh diesel man a tihsan atangin kawng siamna tur nuai sang tam a khawnchhuak tawh a. Thla khatah vaibelchhe tam tak a khawn chhuak reng tih sawiin, mipuiah oil man a san laiin, a tisangtute chuan sawrkar atangin a thlawnin petrol leh diesel (free coupon) an dawng thung tih a sawi.
“Mipui hnen atanga chhiah hrang hrang nasa taka lak a nih lai hian, sawrkarah post siamchawpin ZPM hruaitu tam tak ruat an ni a, heng mite enkawlna tur hian term khat chhungin nuai tam tak sen a ni dawn,” Dr Lalmalsawma hian a ti.