Coop society ho hmasawnna sawi

Kolasib District Cooperative Development Committee (DCDC) chu an chairman, district bawrhsap John LT Sanga hoin Thawhlehni khan an thukhawm a. District chhunga cooperative society ho hmasawnna tur an sawi ho.
Kolasib DCDC convener, district cooperative officer Lalthlamuana chuan report danin, an district chhungah sector hrang hrang 15-ah cooperative society din leh inziaklut 97 an awm tawh.
Cooperative society ho zingah primary agriculture cooperative credit society (PACS) anga kal a, member-te hnena sum puktir thei tura bank ang deuha kalpui tum mekah Mizoramah PACS 73 awm tawhin, Kolasib district-ah PACS 6 an awm mek. PACS hi bank tenau anga kalpui a nih dawn chuan online hmanga engkim kalpui a tul dawn a, khawl hmanga thlunzawm (computerised) tur a ni. A thawh khatnaah PACS pahnih – Kolasib Multipurpose CS Ltd leh Kolasib Village Farming CS Ltd chu thlunzawm tawh niin, computer, UPS, printer leh hmanraw mamawh dang pek an ni.
A thawh hnihnaah PACS pali – Kawnpui LAMPS, Saipum Broom Growers, Kawnpui Village Farming leh Vairengte Consumer C/S Ltd chu khawl thlunzawm tura hma lak nise, tih a ni.
Ministry of Cooperation-in PACS ho tana inkaihhruaina, common bye-law nei tura a tih bawhzuia Mizoram Registrar of Cooperative Societies-in inkaihhruaina Mizo tawnga lehlin a lo thawn chu Kolasib district-a PACS 6 leh inziaklut thar apiang hmantir zel nise, tih a ni a. PMBJP hnuaia damdawi zawrh phalna dil CS 5 thlan, PMKSK hnuaia lei tha zawrh dil CS 8 thlan, ran vulh leh sangha khawi lama tuiten PACS an din belh zel theihnana hma lak, National Cooperative Data Base-a CS ho dinhmun tharlam thunluh zung zung a nih theih nana hmalakna leh district chhunga CS ho hmasawnna tur thil pawimawh sawi ho a ni bawk.