Coop society tih chakna tur rel

Khawzawl District Cooperative Development Committee (DCDC) chu an chairman, district bawrhsap K Lalrohlua kaihhruaiin Thawhtanni khan an thukhawm a. DCDC mawhphurhna hrang hrang bakah an district-a cooperative society tih hmasawn leh tih chak zel dan tur an sawi ho.
Khawzawl district-a khaw pahnih – Rabung leh Tualte khuaah primary agriculture credit society (PACS) changtlung taka kalpui mek a nih thu sawi a ni a. Biate, Kawlkulh, Chawngtlai, Tualpui leh Dulteah pawh PACS hi din tuma hma lak mek niin, PACS an indin fel hnuah cooperative society chungchang chu khawtlang huapa inzirtir nise, tia rel a ni.
Thutkhawmah hian PACS/ farmer service society (FSS)/ large area multipurpose cooperative society (LAMPS) ten hmunhma an mamawh a nih chuan, an dilna ngaipawimawh turin Khawzawl bawrhsap pisa-in village council tin hnenah ngenna siam se, an ti a. Cooperative society anga hmasawnna ruhrel din mamawh an awm chuan bawrhsap pisa kaltlanga remchang dapsak nise, an ti bawk.
DCDC thuneihna leh mawhphurhna pawh thlir ho a ni a. DCDC hi cooperative society (PACS, LAMPS, FSS) te hnena Fair Price Shop license pe thei tura thuneihna pek a nih angin, concern department (District Civil Supplies Office) in pilot project atan FPS license pek tur society pakhat ngaihtuah se, tiin thu dah a ni. Cooperative society-ten sawrkar laipui scheme haichhuah an duh chuan detailed project report siam kawngah DCDC-in a puih theih thu sawi a ni bawk.