Copa del Rey last 8 lut Barca

On Jan 17, 2026 8 0

Copa del Rey last 8 lut Barca
Champion lai Barcelona chuan Copa del Rey last 16-ah sihnih faiin mualneitu Racing Santander an hneh a, an title kawl lai humhim thei turin quarter-final an lut leh ta phawt.
La Liga hmahruaitu Barca hian second-tier club lakah goal thun an harsat rei hle a, second half minute 66-ah Ferran Torres chuan mikhual tlarhma harsatna sukiangin goal hmahruai a khung ta nge nge a, season kal laia Barcelona tana a goal 15 thunna a ni ta.
He goal khat hmang hian Nou Camp club an chak dawn emaw tih hnu hun pekbelh minute ngana a kal mek lain Lamine Yamal chuan Raphinha siamsak atangin Barca goal hnih a thawh ve leh.
Defending champion hian Campos de Sport de El Sardinero khelmuala mipui 22,481 pungkhawm hmaah inkhel thunun nghet tlat mah se substitute Fermin Lopez-a chhawpsak atanga kha match-a captain banhren hrengtu Torres-a’n Santander goalkeeper Jokin Ezkieta dan zawh loh goal a chhuihkual luh ngawk hma zawng kha chuan goal chance an siamchhuak hlei thei lo!
Racing Santander hi Spain ram second division league-a hmahruai mektu niin, season thara top flight an luahkir leh theih chuan kum 2012 hnu lama La Liga kawtkai an chuankai leh vawi khatna a ni ang.
Hansi Flick-a team hian season liamta khan cup final-ah Real Madrid an hneh a; Nilaini zanah manager atanga an ban tak Xabi Alonso thlaktu Alvaro Arbeloa hnuaia an game hmasaberah Real hi second division club ve tho Albacete lakah an tlawm a, last eight lut zo loin kumin cup final-ah Barcelona an hmachhawn a rem dawn ta lo!
Quarter-final match-a Barca tum tur chu Thawhtanni hian a chiang chauh ang.