Copa del Rey last 8 lut Barca
Nilaini khan Olimpic Lluís Companys stadium chhunga mipui 46,019 pungkhawm hmaah 5-1 ngawta an mikhual Real Betis sawp chungin Barcelona chuan Copa del Rey quarter-final an chuangkai.
He inkhela goal hmahruai hi tan atanga minute thumna leka Gavi thawh niin, darkar chanve khelh tlin hma hreta Jules Kounde tihluh leh nen Catalan team hian sihnih faiin half time-ah hma an hruai phawt.
Second half-ah Raphinha, Ferran Torres leh assist vawikhat nei bawk Spanish rawlthar kum 17 mi Lamine Yamal-te’n goal khat diat diat thawh belh ve lehin, Real Betis thangtlawm lutuk tur chhanna goal awmchhun hi minute ruk chiah awm tawh penalty atanga Vitor Roque chhuihluh a ni.
Barcelona hian Pathianni liamta mai khan Saudi Arabia rama Clasico-ah 5-2-a an elpui lian ber ni kumkhua Real Madrid sawp chungin Spanish Super Cup trophy an chang a, tualchhungah hnehin bawkin a umzui leh nghal a ni.
La Liga club ve tho Betis lakah Barca coach Hansi Flick khan Real laka hnehna chanpuitu a starter hlun thenkhat Robert Lewandowski, Marc Casado leh Alejandro Balde tihte a awltir a; chuti chungin inkhel tan phat atangin kawng engkimah an chungnung nghal a, tuibur hmuam da pawh tling lo turah Dani Olmo siamsak atangin Gavi goal lawm tur an nei chawpchilh nghal ta reng a ni.
Minute 27-ah Kounde chuan Yamal siamsak atangin an goal hnihna a thawh a; a hnuah Kounde leh Yamal-te thawkdun goal tur chu VAR-in offside-a puangin a dansak a, first half-ah goal dang a luhbelh ta lo.
Second half tir lam minute 58-ah Yamal atanga intan counter-attack atangin Raphinha goal a lut a; substitute Ferran Torres chuan minute 67-ah belh ve lehin, a hnuah Yamal-a goal hmuh tur a awm chhunzawm leh.
Real Betis goal neihchhun thawhtu Brazilian forward Vitor Roque kha Barcelona atanga loan-a an hawh a la ni zui!
Nilaini last 16 inkhel dangah a tawpa player pakua chauh nei tawh Getafe pawhin a tir lama Alvaro Rodriguez-a goal khat tihluh hmangin fourth-tier Pontevedra lakah 1-0 hnehna an chang hram a; Rodriguez hi lehlam pawl player hmaia a hnek avangin minute 41-ah straight red card hmanga hnawhchhuah a ni!
First half hun pekbelhah yellow card vawihnih hmuh vangin Getafe player Diego Rico hnawhchhuah a ni ve bawk.
Leganes pawhin si phur hmasa zet chungin Spanish second division hmahruaitu Almeria lakah 3-2 hnehna an chang hram a; La Liga hmahruaitu Atletico Madrid chuan sili faiin Elche lakah hnehna nuamsa an chang thung.
Thawhlehni daih tawh khan Valencia pawhin third-tier side Ourense lakah 2-0 hnehna changin, ti hian, kumin Copa del Rey quarter-final khel turte chu La Liga club vek an ni ang.
He thu buatsaih lai hian nizan last-16 match bang pahnih la awma Athletic Bilbao leh Osasun, Real Sociedad leh Rayo Vallecano inkhel result tarlan hman a ni lo.
Copa del Rey last 8 lut Barca
Get real time updates directly on you device, subscribe now.
Prev Post
Next Post