Giuseppe Meazza khelmualah an mikhual Bologna nen sihnih ve ve thuna inhnehtawkin Inter Milan chuan an kawtkaiah point hnih ngawt an hloh then a, Serie A title race-ah an hnungtawlh leh rih.
Karliamta mai Italian Super Cup final-a an hmelma lian AC Milan laka tlawm Inter hian point 44 nen Serie A standing-ah pahnihna la luah zui tho mah se point thum laiin hmahruaitu Napoli lakah an hniam tawh a ni.
December fixture pakhata an luhkhung tur Fiorentina midfielder Edoardo Bove khelmual chhunga a tluk avang khan league-ah Internazionale hian Napoli aiin game khatin an la khel tlem tho a, he game khat hmabak an neiha an chak chuan Napoli mawngphe hmuh hnai lehna chance an la nei!
Nikhaw hre loa tlu Bove kha a harhchhuak leh mai a, lung zai (heart surgery) erawh a pumpelh zo ta chuang lo a, khelmual chhungah kan hmu leh dawn em a hriat rih lo.
Game khat bawka khel tlem chungin point 30 neitu Champions League side Bologna chuan table laihawl luahin pariatna an ni.
League-a defending champion Inter point hloh hnuhnunber tum chu nikum November ni 10-a an mikhual Napoli nena 1-1-a an inhnehtawk kha niin, tunah an kawtkaiah bawk draw an hlawhchhuak leh ta a ni.
Nilaini zan inkhelah Bologna lamin Santiago Castro goal hmangin minute 15-na lekah hma an hruai a, mahse, minute li lek hnuah Denzel Dumfries chuan mualneitu team siphurh a sut zui ve leh mai.
Half-time hma chiahin Inter lam hian phu takin hma an hruai zui ve ta thung a, he goal hi hnai set sawt atanga an player hlu bik Lautaro Martinez-a tihluh niin, Argentine hian tun season-a game 26 a khelh tawh atangin goal kua thun tling tawh.
Bologna lamin second half minute 64-ah defender Emil Holm-a goal hmangin an siphurh an sut ve leh a, chak zawk awm loin team pahnih an inthathen.
Pathianniah Inter Milan-in table-a 14-na luahtu Empoli an mikhual ang a, karleh Nilaini Champions League-ah Sparta Prague an luhkhung zui leh ang.
Inrinnia a mawngphah team Monza mikhual tur Bologna pawhin karleh Thawhlehniah Europe club competition lian ber khelin Borussia Dortmund an mikhual ve bawk dawn a ni.
Home draw vanga point hloh Inter
Get real time updates directly on you device, subscribe now.
Prev Post
Next Post