Council of Ministers-in dinhmun sang zawka sikul 263 hlankaina pawm Mizoram journalist’s pension scheme 2023 pawm a ni bawk

Nimin khan Chief Minister Zoramthanga hovin CM cabinet meeting room-ah Council of Ministers chu sawrkar department hrang hrang a\anga thu pawimawh lutte ngaihtuahin an \hukhawm a, meeting-a thurel an pawm tak zingah, dinhmun sang zawka sawrkar sikul 263 hlankaina pawm a ni a; Mizoram journalist’s pension scheme 2023 pawm a ni bawk.
Sikul hlankaina chungchang leh journalist pension scheme chungchangah hian nimin khan education minister Lalchhandama Ralte leh I&PR minister Lalruatkima te chuan press conference koin thil awmzia an sawifiah nghal.
Education Minister chuan adhoc grant-in-aid a awm mek sikul 180 te chu October ni 1, 2023 atangin provincialised-a hlankai an nih tur thu sawiin, kum hnih chhung probation period anga kalpui a nih hnu kum 2025 atangin sawkar sikul tak tak anga pawm an nih tur thu a sawi a. Lumpsum grant-in-aid a awm mek sikul 52 te chu tunhmaa la awm ngai lo provisional adhoc grant-in-aid ah hlankai an nih thu sawiin, provisional adhoc grant-in-aid hnuaia thawk zirtirtute chu half basic leh half DA angin hlawh an pek bakah April ni 1, 2024 atanga hman tan tur a nih thu a sawi bawk.
Hei bakah hian private sikul, khawtlang din leh enkawl mek sikul 31 te chu lumpsum grant-in-aid a hlankai thar an nih thu sawiin, lumpsum grant-in-aid dawng mek sikulte chu enkawl a hautak em avangin a chhawk zangkhainan an lumpsum dawn thinte chu tih pun a nih tur thu a sawi a. Sikul provincialised leh upgrade thar zawng zawngte chu 263 an nih thu sawiin, lumpsum grant-in-aid tihpun turte nen an vaiin sikul 341 an nih thu a sawi.
Sikul hrang hrang dinhmun sang zawka hlankaite chu an lungawi lohna an lantir vanga hlankai an nih loh thu sawiin, heng sikul hrang hrang hrang dinhmun sang zawka an hlankaite chu tehfung chi hrang hrang hmanga an endik hnua hlankai an nih thu minister hian a sawi bawk.
Mizoram journalist’s pension scheme 2023 chungchangah Information & Public Relations changtu minister Lalruatkima chuan pension scheme chu sawrkarin a ngaihpawimawh thu sawiin, sawrkar leh mipuite inkara palai hna thawk thintu MJA ten an dincham kum 50-na an hman mek lawmpui nan pawm a nih thu a sawi a. He pension scheme hi sawrkar accredited journalist kum 30 thawk tling tawhte tan duan a nih thu sawiin, kum 60 tling tawh ten an hna an bansan hnuah an dil thei tih a sawi a. Natna khirh takin a tlakbuak avanga hnathawk thei tawh lo, kum 60 la tling lote te paw’n kum 30 chhung journalist hna an thawh hman chuan an dil theih thu a sawi bawk.
I&PR minister hian nimina Council of Ministers thukhawmin agenda hrang hrang pariat an rel atangin pakhat tih loh chu an pawm vek thu a sawi a. The Mizoram Vehicles rules 1995 chu siam danglam niin, local council ten garage certificate hriatpuina an pek thin chu thuneihna pum hlum local council kuta pe tawh tura an pawm thu sawiin, Social Welfare & Tribal Affairs Department chu Social Welfare, Tribal Affairs, Women & Child Developement Department tia kaihkawp a nih thu a sawi a. Ministry of Home Affairs-in Myanmar raltlante biometric leh biographic laa chhinchhiah tura an rawn ngenna chu pawm a nih loh thu sawiin, zohnahthlak unaute tan Mizoram sawrkar chu a tawp thlenga a din tur thu a sawi bawk.
CoM meeting-in a pawm zingah hian- The Mizoram Water Resources (Management & Regulation) Bill, 2023 te; Amendment of the Mizoram Public Record Act, 2011 te; Repeal of the Mizoram Exhibition of Films on Television Screen (Through Cassette Players) Act, 1990 te a tel bawk.
Heng bakah hian One time relaxation for regularisation of contract & PE Employeee outside the prescribed quota chu sawi ho a ni a, a thuphungin pawm a ni a. Aizawl North College hmun turte, Ramhlun Venglai Hall hmun turte, Zuangtui Presbyterian kohhran Biak in hmun te leh Chaltlang Lily Veng MUP te ram tur chungchang sawi ho a ni a. Land Revenue & Settlement Department lamin a tul angin a hma lo la se, a kaihhnawih department dangte leh khawtlangho rawn chungin bawhzui se an ti bawk.