A vawikhatna atan Council of Ministers meeting chu Lungleiah neih a ni ta a. Chief minister chuan, Lunglei mipuite lakah tha ba an ngah thu a sawi a. An sawrkar chuan Lunglei an ngaihthah dawn lohzia tihlanna hmasa atan Council of Ministers meeting chu Lungleiah an nghat tih a sawi bawk a.
Lungleia CoM meeting nghah a niha inbuatsaihnain a nghawng thui dan turzia hi Mizoram dinhmun vei em emtute chuan an chhut thiam maiin a rinawm. Inrenchem (austerity measure) ngai pawimawh em em anga insawi sawrkar thil tih atan chuan a inhmeh lo a tih theih bawk ang.
CoM meeting chhiarkawp hi heti hian han chhut chhin ta ila: Council of Ministers te hi Aizawl khawpuia awm an ni deuh vek a. State capital-a CoM meeting neih a nih hian, meeting room panna kalkawng hi member tinte tan chawhrualin kilometre 5 angin a chhut theih ang a. Vah chhuah apianga hautak ber chief minister erawh a hmunthu a nih avangin senso hranpa ngai lo tura ngaih a ni.
Lunglei hi Aizawl atangin kilometre 160 vel a ni a, chu chu kilometre 5 let 32-a thui a ni. Heta tang hian minister-te veivahna lirthei atana POL, ei leh in senso etc. chu a let 30 vel anga ngaih theih a ni ang a. Chief minister escort party leh minister dangte zuitu official lirthei leh a behbawmte nen lirthei 20 vel chu che tura ngaih a ni. A dawngsawngtu Lunglei lamin inbuatsaihna atana an senso zawng zawng nen, he meeting neihnaah hian mihring tha, hun, sum leh pai leh ei leh in atana senso chu thingtlang khaw te deuh hmasawn awkna tham a tling thei hial awm e.
Council of Ministers meeting hi tha ba sutna hmanrua anga sawi a lo nih takah chuan, district tin capital-te hian tha ba sutna tur hi an beisei zui ve hlawm mai ang em tih zawhna a lo piang thei bawk ang a. Chutiang chu lo thleng tak tak ta se, ‘Lunglei hi chu district dang thik theih loh’ tiin district dangte beiseina chu an hnawl mai dawn nge ni ang a, district pakhatah kan kalpui tawh si a, district dangah pawh meeting hi nghat diat diat vek law law mai ang, an ti dawn? Chuti a nih chuan senso bawk hi….
Zawhna a tam thei dawn hle a. District capital-a CoM meeting nghah hian eng hmasawnna ruhrel nge a ken tel? A that bik riauna eng nge? District-in eng tin emaw taka hmasawnna a neih phah theihna tur a awm em? A awm a nih pawhin, kal chilh kher a tulna eng nge? Ralkhat atanga rel theih a ni ve lo tihna em ni dawn? District capital duhsak bik anga ngaih theiha thil a kal hi a fuh ber dawn em ni?
State dangin hetiang hi an lo kalpui a nih pawhin, keini chuan entawn ve kher loh hi kan tihtur ni zawk awm tak a ni.
Council of Ministers meeting chhiarkawp…
Get real time updates directly on you device, subscribe now.
Prev Post
Next Post