Country artist tour a\anga sum lalut tam ber Kenny Chesney

Billboard Boxscore chuan kum 40 dawn music industry-a genre hrang hranga zaithiam te tour atanga sum lakluh dan an lo chhinchhiah tawh a, 1985 atanga August ni 16, 2023 thlengin country star zingah Kenny Chesney chu tour atanga sum lalut hnem ber a la ni.
2023 Billboard Boxscore Mid-Year report-ah chuan tun thla ruk chhungin pop star Harry Styles chu a hmahruaitu a la ni a, ani hian Love on Tour a neih atangin dollar maktaduai 138.6 lalutin, ticket maktaduai 1.2 a hralh a, November ni 1, 2022 leh April ni 30, 2023 inkarah show vawi 38 a nei hman a. He mid-year report-ah hian genre hrang hrang thliar lo va sum lalut tam zual zingah country artist atangin Luke Combs, Morgan Wallen leh Carrie Underwood te an lang thei bawk.
Billboard Boxscore-in a tarlan dan in, kum khat mai ni lo, tun kum 40 chhunga country artist zinga tour atanga sum lalut hnem ber chu Kenny Chesney niin, ani hian show vawi 952 a neih tawhah ticket maktaduai 17.9 hralh tawhin, dollar tluklehdingawn 1.172 a lalut tawh a, country artist zingah tour atanga dollar tluklehdingawn lalut thei awm chhun a la ni.
He list-ah hian George Strait atanga Garth Brooks, Shania Twain atanga Taylor Swift thlengin an lang a, chhinchhiah tur pawimawhah chuan Garth Brooks-a tour hnuhnung- The Harth Brooks World Tour (2014-2017) leh The Garth Brooks Stadium Tour (2018-2022) te chu Boxscore-ah report a ni lo a, hemi tel lo chung pawh hian No.13 a ni thei a ni.
Taylor Swift pawh pop lama a kal hma, 2009-2010 The Fearless Tour atanga 2013-2014 The Red Tour te lak a ni a, mahse, 2014-a country atanga pop lama a pakai tak hnua a tour zawng chu country artist anga chhiar a ni tawh lo a, hei vang hian 2015-a The 1989 World Tour a neih atanga 2018-a Reputation Stadium Tour a neih leh tuna The Eras Tour a neih mek te chu chhiar tel a ni tawh lo.