Country Legend Kris Kristofferson a thi

Country superstar leh Hollywood A-list actor Kris Kristofferson, kum 88, chu Maui, Hawaii-a a chenna inah September ni 28 khan a thi tih a thupuangtu Ebie McFarland chuan a puang a, Kristopherson hi a chhung ten an dawm hlum a, thlamuang takin a chawl ta tiin McFarland chuan thuchhuah siamin a puang a, a thih chhan erawh a puang tel lo.
Kris Kristofferson hi country music tana mi ropui tak niin, a zaithiam mai bakah a hlaphuah thiamna leh a hlaphuah dan style te chu larpuiin, 1960s tawp lam atangin rimawi khawvelin a hmelhriat tan a, a hla phuah “Sunday Mornin’ Comin’ Down,” “Help Me Make It Through te Night,” ‘For te Good Times,” leh “Me and Bobby McGee” te chu a hlawhtlinpui hle. Kristopherson hi zaithiam ni ve tho mah se a hla tam zawk hi midangin an sa lar thung a ni.
Lemchan lamah pawh 1974-a Martin Scorsese film siam ‘Alice Doesn’t Live Here Anymore’-ah Ellen Burstyn nen an chang dun a, 1976-ah Barbra Streisand nen ‘A Star Is Born’-ah an chang dun a, 1998-ah Wesley Snipes nen ‘Blade’-ah an chang dun tawh bawk.
Kristofferson hian Billboard 200 (albums) chart-a lang thei album 19 a nei hman a, chung zingah chuan ‘A Star Is Born’ soundtrack chu No.1 a kai thei. Billboard Hot Country Songs chart-ah 1973 khan a hla ‘Why Me’ chu a No.1 a, 1985-ah all-star collaboration ‘Highwayman’ chu No.1 a kaipui bawk. He hlaah hian Waylon Jennings, Willie Nelson leh Johnny Cash te nen an thawkho.
Kristofferson hian Grammy Awards- best country song (Help Me Make It Through the Night, 1971), best country performance by a duo or group (Rita Coolidge nena an zai dunna Form the Bottle to the Bottom, 1973 leh Lover Please, 1975) te a dawng a, 2014 khan Lifetime Achievement Award a dawng bawk. ‘Sumday Mornin’ Comin’ Down’ avangin 1970 khan CAM Award dawngin, 1985-ah Highwayman avangin ACM Award a dawng a, Country Music Hall of Fame-ah 2004-ah lak luh niin, 2019 khan Country Music Association-in Willie Nelson Lifetime Achievement Award an hlan tawh bawk. Lemchan lamah pawh 1976 khan A Star Is Born avanginGolden Globe a dawng tawh bawk. 2006 khan Songwriters Hall of Fame award ngaihhlut tak Johnny Mercer Award a dawng tawh bawk.