Court thupek bawhzuiin MIC-in MUHCS-a inremna pe turin a ti

High Court thupek bawhzuiin State Information Commission chuan State Health Care Society chu Mizoram Universal Health Care Scheme kalpuinaa Synod Hospital nen an inrem dan RTI zawhna chhanna chu kumin September 23 ralhmaa pe turin a hriattir.
Tarlan tawh thin angin, MUHCS kalpuina atana Mizoram State Health Care Society (MSHCS) leh Synod Hospital Durtlang-in inenkawlna senso atana inpek tur zat (rate) chungchanga inremna, Memarandum of Agreement (MoA) an siam dan copy leh rate kimchang pe chhuak turin advocate J Malsawmzuala Vanchhawng chuan RTI hmangin a lo dil tawh a. MSHCS hian Synod Hospital lam nena an inremna hi dan tlawhchhan (confidentiality clause) hmangin midang (third party) hnenah pek/ puanzar a rem lo tiin, a pe lo a. RTI diltu hian a beisei ang chhanna a hmuh theih loh avangin Mizoram Information Commission (MIC) ah a zualko ta a ni.
MIC hian RTI dan tlawhchhan neiin, information diltu hnenah hian a duh ang pechhuak turin MSHCS hi a hriattir a. An ni hian an dan tlawhchhan a din chan theihnan High Court-ah an zualko ve ta thung a ni.
High Court-in hemi chungchanga thutlukna a siam danin, MUHCS chu mipui tana duan leh mipui sum hmanna a nih avangin ‘public interest’ a ni a, langtlang taka kalpui tur a ni, tih leh, RTI Act 2005-in puanzar loh tur chi thil thenkhat a tarlan chuan Health Care Society leh Synod Hospital inremna hi a huam lem lo, tiin, inremna hi puanzar theih chi a ni tih a nemnghet a. Hetihrual hian Mizoram Information Commission chu Synod Hospital lamin sawi tur an neihte sawi na hun siamsak a, dan anga thutlukna siamtha leh turin a hriattir a ni.
Court thutlukna bawhzuiin MIC hian September 2 leh 14 khan hearing a ko a. Hearing-ah hian Synod Hospital aiawh leh Mizoram Synod aiawh pawh an inlan a, inrem dan (MoA) information pekchhuah remtih lohna an nei em tih zawh a ni.
Synod Hospital chu mission/ charitable hospital a nih avangin an rate pawh private hospital dang aiin a hniam zawk a, chuvangin MoA leh rate kimchang puanzar chungchangah anmahni lam chuan remtih lohna an nei lo a. Chutihrualin, MSHCS nena an inremnaah confidentiality clause chu rinawm taka zawm an duh avanga puanzar remti lo mai an ni tih an sawi
MSHCS nena MoA siam hi Synod-a Committee sang zawk pawmpuina lak hnua siam chauh a nih bakah inremnaa hming ziah hnantute pawh Synod hotu sang zawkte nemngheh emaw pawm emaw a nih loh chuan, puanzar chungchangah anmahniin thutlukna an siam thei lo tih MIC hmaah hian an sawi thung.
Hemi ang hian MIC chuan Synod executive secretary i/c Synod Hospital hnenah an aiawha dingte thusawi hi nemnghet/ pawmpui tura ngenna siam leh niin, an pawmpui tih ziaka an thlen hnu ah MIC hian thutlukna a siam ta a ni.
MIC chuan, RTI-a thil dil hi mipui scheme, mipui sum hmanna thil a nih avangin mipuiin an hriat a tul a. Hei hi High Court ngaihdan pawh a nih avangin, langtlang taka mipui sum hmanna puanzar chu hup beh theih a ni loa, SPIO hian RTI diltu zawhna hi a thlawnin 2026 September 23 ral hma in a pe tur a ni, a ti.
Information diltu J Malsawmzuala Vanchhawng chuan, mipui tana duan, sum hmanna lian tak ni bawk, MUHCS kalpui tura sawrkar leh mimal hospital inremna thup tlat leh Assembly House-ah pawh MLA-ten an zawt chhuak thei lo chu dan kalh nia a hriat vangin RTI Act hmanga information hi dil a ni tih a sawi a. Synod Hospital bakah hian mimal damdawi in dang leh sawrkar inremna a dil pawh State Information Commission-ah hian a la inchiah mek tih a sawi.