Nilai zan khan championship play-off semi-final khelh zawh a ni a. Coventry City chuan Middlesbrough chu Riverside Stadium-ah si khat faiin an hneh a, final an lut. Coventry hian English Premier Leageu-a kaisang tur zawnna hnuhnungah Luton Town an hmachhawn zui leh ang.
Play-off semi-final thawkhatnaah Middlesbrough leh Coventry City te hi goal awm lovin an lo inhnehtawk tawh a. An mualah an chak zawh loh vangin Coventry dinhmun derthawng zawka ngaih niin, Boro tan final luh theihna hun tha tak a awma ngaih a ni thung. First leg ang bawkin second leg-ah pawh an inhnehtawk leh viau a, chawlhlawk hmain goal thun thei an awm lo.
Second-half-ah Coventry an khel tha ta viau thung a, goal pawh an thun har lo. Minute 57-naah Gustavo Hamer chuan Gyökeres siamsak atangin hmahruaina goal a thun. He goal hi hun tawp thlenga venghimin, hnehna pawimawh tak an chang a, final an lut ta a ni.
Football-ah vawi khat chaka ni hlawhna tam ber ang hiala an sawi thin championship play-off final hi May 27 khian Wembley-ah khelh a ni dawn a. Coventry City hian kum 22 zet hnuah a vawi khat nan English Top Flight a inlan tumin Luton Town an hmachhawn ang.
Coventry in final an lut
Get real time updates directly on you device, subscribe now.
Prev Post
Next Post