Ningani zing khan NBA Eastern Conference play-off final game khatna khelh a ni a. Inkhel hmuhnawm takah Miami Heat chuan point 123-116 in Boston Celtics an hneh.
Final game khatnaah hian Celtics in bul an tan tha a, quarter hmasa pahnihah chungnung zawka an tan bakah quarter hnuhnung berah chungnung zawkah an tang leh bawk. Quarter thumah ngawt hnufual zawk ni bawk mahse quarter thumnaah point 21 zeta chungnung zawk an nihna an chhawr tangkai a, Miami Heat in hnehna an chan thei phah.
Quarter hmasa berah point hniha chungnungin Celtics in bul an tan tha zawk a. Quarter hnihnaah point ruka chungnung zui lehin, point 8 a hmahruai chungin chawlhlawk an hmang. Chawlhlawk hnu lamah Heat in bul an tan tha ve thung a. Quarter thumnaah tha chungchuang taka inlanin point 46 zet an thawkchhuak a, point 21 zetin chungnung zawka tangin hma an hruai let. An hmahruaina an hloh hnuin Celtics in chak tumin tan an khawh zui a, quarter hnuhnung berah point ngain chungnung zui leh bawk mah se point 7 ngawtin an khingpuite an umphak zo lova, tlawm zawkah an tang zui ta a ni.
Celtics an hneh theih nan Miami Heat tan Jimmy Butler a chetha leh viau a, vawi 35 a thawkchhuak. Kum 33 mi Buttler hi post season-ah a che tha leh zual a, play-off ah hian game tinah point 31.1 zel thawkchhuak ang a ni a. Regular season-ah khan game tinah point 22.9 thawk chhuak zel anga chhut a ni ve thung. Heat lakah an tlawm tum hian Celtics player pawimawh Jayson Tatum chuan point 30 a thawkchhuak a, Jaylen Brown pawhin point 22 a thawkchhuak ve bawk.
Heat in bul an tan tha
Get real time updates directly on you device, subscribe now.
Prev Post
Next Post