Covid-19 hri vei awm leh

Covid-19 lakah Mizoram a fihlim vang vang a, mahse ni 30 dawn hnu-ah hri vei an awm leh.
September ni 6, Nilaini khan hri vei hriatchhuah an ni leh; sample pahnih endik a ni a, pakhatin hri a lo kai tih hriatchhuah niin, August ni 8 hnua hri vei hriatchhuah leh hmasak ber a ni.
August ni 8 khan mi pathumin hri an vei tih hriatchhuah a ni a, chumi hnu-ah hri vei hriatchhuah an awm zui loh vang vang bakah, August ni 15-ah enkawl lai mi pali an chhuak a, hri vei enkawl pawh an awm lo vang vang. September ni 6-ah hri vei hriatchhuah thar an awm leh a, enkawl pakhat an awm thar leh tihna a ni.
September ni 6-a hriatchhuah thar hi Aizawl district mi a ni a, a hma chuan he district-ah hian August ni 8-a hriatchhuah kha hri vei hnuhnung ber a ni thin.
Hnahthial, Lawngtlai, Mamit leh Siaha district-ahte chuan kuminah hri vei hriatchhuah an la awm lo a, Hnahthial district-ah phei chuan hri vei hriatchhuah thar hnuhnun ber hi nikum October ni 3-a mi daih tawh a ni. Siaha district-a hriatchhuah thar ber pawh nikum October ni 6-a mi a ni. Champhai district-ah July ni 4 khan hriatchhuah an awm a, Khawzawl district-ah May ni 5-ah, Kolasib district-ah June ni 10-ah, Lunglei district-ah July ni 1-ah, Saitual district-ah May ni 2-ah, Serchhip district-ah May ni 30-ah hriatchhuah an awm. Chung chu a hnuhnung ber an ni rih.
Tun hnaia hri vei hriatchhuah thar an awm leh hi thuneitu lam chuan mak an ti lem lo a, hri nihphung ve reng a ni an ti. Covid-19 chungchanga sorkar thupuangtu Dr Pachuau Lalmalsawma chuan, “Min chenchilh tawh a, hun engemaw chen chu hetianga hriatchhuah tur hi a awm ang. Chutiang chu ram dangah pawh a ni,” a ti.