Covid-19 : Lab atanga putru a ni thei ti

Covid-19 chu laboratory atanga putru a ni thei tiin top Chiense government scientist chuan a sawi.
Chu thu sawitu chu China’s Centre for Disease Control (CDC) hotu lu ber Prof George Gao niin pandemic beihletna leh a chhuahna chhuina kawnga hmalatu a ni.
A hma zawngin China sorkar chuan pandemic leng chu Wuhan laboratory atanga putru ni theia ngaihna chu a lo hnawl tawh thung a. Mahse, Prof Gao chuan ngaihdan dang a nei tlat.
BBC tena “Fever: The Hunt for Covid’s Origin” tia interview an neihnaah Prof Gao tuna CDC atanga a chawlh hnua National Natural Science Foundation of Chin vice-president ni mek chuan, “Engkim rinhlelh a ngai a, chu chu science a ni. Engmah a ni lo a tih ngawt theih loh,” tiin a sawi.
Prof Gao thusawi hian khawvelin a hriat aia nasa in China sorkar chuan ‘lab leak’ ni theia ngaihna chu an ngai thutak tia ngaih theih niin Wuhan Institute of Virology (WIV) pawh chhui chianna an nei nghe nghe a ni.
“Sorkar in eng emaw tih a nei” tiin Prof Gao chuan a sawi a, mahse, a sawi thui duh lo thung a. “Lab te pawh mithiam ten tum hnih lai an enfiah a ni” tiin a sawi bawk.
China sorkar chuan official investigation a nei ngeia ngaih a ni a, mahse Prof Gao chuan an thil hmuhdan chu hriatzuina a nei lo tiin a sawi a, a hnuah erawh lab chu fihlim anga sawi a ni tiin a sawi bawk a. “Thutlukna ans iamah protocol zawm vekin engmah thil fello an hmu lo ni tur a ni” tiin a sawi.
Covid thlentu virus hi bak atanga chhuak ngei nia ngaih a ni a. Mahse, bak atangin mihringa kaina chu zawhna a ni a, chumi tur chuan zawhna pawimawh pahnih a awm bawk a.
Pakhatna chu vius chu bak atangin mihringah naturally in inkaichhawnin ransa dang kaltlangin mihring in a kai a tih theih a. Hei hi scientists te pawhin tun dinhmunah chuan thil nihna ni thei awm bera an ngaih a ni.
Pahnihnaah chuan scientists thenkhatte chuan research neihnaah nature atanga virus piang hriatfiah tumna zirchiannaa lamah tu emaw in a kai palh hlauh maia chu chu a darhta zel a ni an ti.
Heng thil pahnih te hi geopolitical buaina thlen lai leh conspiracy theory tam tak awm laiin inhnialna siamtu a ni a, tun thlengin Covid origin chu scientific debate mai bakah politics thlenga inbeihna thlentu langsar tak a la ni zui zel a ni.
January 2020 daih tawh khan Singapore-based scientist, Prof Wang Linfa chuan hononary professor a nihna Wuhan Institute of Virology (WIV) a tlawh a, hripui len vanglai niin chutah chuan lab leak theory chu ni theia a ngaihloh thu a sawi.
Prof Wang hi Duke-NUS Medical School, Singapore a infectious disease professor niin WIV a infectious disease professor tho Prof Shi Zhengli nena inbepawp leh thawk duntha an ni.
An pahnihn khawvela bat coronavirus lama mithiam chungchuanga ngaih an ni a, an hming lemah pawh Batman leh Batwoman tia vuahsak an ni.
Prof Wang chuan Prof Shi chuan a lab ah a hriat hauh lovin virus pakhat eng emaw pai putru a awm tia sawiin chuvang chuan hlauthawngin ni hnih khat chu a mut that hleih theih loh thu a hrilh tiin a sawi a.
Mahse, a hnuah Prof Shi chuan a sample te a enfiah hnuah chung virus te chu Covid thlentu an ni lo va, pandemic leng nen inkaihhnawihna an nei lo a tih thu a sawi bawk. Pro Wang chuan Prof Shi leh a team te chuan engmah thup tur an nei lo a ti bawk.
Chutih lai chuan US intelligence report chuan kum 2019 favang lai khan WIV ah mi pakhat damlo a awm a ‘a nat dan chu Covid-19 kai te awm dan ang chiah a ni’ tiin an sawi ve thung.
Prof Wang chuan Prof Shi hennah January 2020 khan amah leh a team te chu blood sample la tura a tih thu sawiin an lak zui thu leh chutah chuan test negative vekin Covid antibodies an nei lo vek a ti bawk.
Prof Wang hi scientists tam tak zinga virus chu Wuhan market atanga mihringa inkaichhawn ringtu a ni a. Wuhan a Huanan Seafood Market chu ransa chi tin reng zawrhna a ni. China chuan scientists te a thawhpui tha duh lo hle chungah tunah erawh scientists te chuan information hrang hrang an neih atangin ‘lab leak’ theory chu an hnawl thung a.
March 2020 khan paper “The Proximal origin of Sars-Cov-2” tihah chuan scientists tha leh lar ber ber te chuan “Laboratory atanga virus putru nia ngaihna hi chu kan hnawl a ni,” tiin an sawi.
Mahse, a hnuah he paper author pakhat chuan thutlukna an siamah chuan ngaihthatlohna emaw rinhlelhna aneih leh thu a sawi thung a. Ian Lipin, professor of epidemiology, Columbia University in New York chuan an paper tihchhuaha lab-based scenario chu an sawina lutuk mah mah nia a ngaih thu a sawi zui ta thung a ni.
Wuhan sea food market chu virus chhuahna nia a ngaih ber a la nih reng thu sawiin leh virus chu siam chawp emaw nia a ngaih loh thu a sawi a chutih rual chuan laboratory emaw research thil avanga kalsuala putru a ngaihna chu hnawl mai chi a ni lo a ti zui a ni.
Eng pawh ni se, Prof Gao an lab atanga putru pawh ni theia a sawina chu China sorkar dinna nen inkalh tlat a ni a. “Lab leak tia sawi fo hi anti-China te siam a ni a. Politics thila lak niin scientific behchhan a nei lo,” tiin UK-a Chinese embassy chuan thuchhuah an lo siam tawh a ni.
China chuan Covid-19 chu an lab emaw market atanga chhuak a ni lo va, ram dang atangin frozen food packaging atanga irhchhuak tiin an sawi ve thung a.
“Khawi atangin nge virus hi a lo chhuah kan hre lo tak zet a. He zawhna hi la inzawh zel a ni,” tiin Prof Gao chuan a sawi.
Scientists te inhnialna chu engpawh ni se, China pawn lamah chuan thil chiang tak awm a awm a, China chuan finfiahna neihna lamah hma a la tawk lo tih a ni.
Khawi atangin nge Covid a lo chhuah tih chu zawhna zawh awlsam tak a ni thei a. Mahse, Covid avanga nunna chan tam tak te, harsatna leh tawrhna namen lo tuar te tan chuan chu zawhna chhanna hriat chu tihmakmawh a la ni reng.