Covid lakah Mizoram fihlim leh tawh

Tun hnaiah Mizoramah Covid-19 hri vei hriat chhuah an awm a, enkawl dam an nih tawh avangin Mizoram chu he hri lakah hian a fihlim leh tawh.
May ni 30-ah khan hri vei hriat thar mi pahnih an awm a, ZMC-ah enkawl nghal niin, June ni 4-ah pakhat a chhuak a, ni 5-ah pakhat dang a chhuak leh. Chumi hnuah hri vei hriat thar an awm rih lo.
Mizoramah Covid-19 hri endikna hi ZMC-ah chauh a awm rih a, sample endik pawh a awm ve deuh reng. Inrinni, June ni 7-ah pawh khan mi pakua endik an ni a, an him vek. June ni 6-ah mi paruk endik an ni a, June ni 5-ah panga, June ni 4-ah pahnih, ni 3-ah 13 endik niin, tun thlaa endikte hi an him vek.
Tun hnaiah ram thenkhatah Covid-19 hi a darh leh a, India ram hmun thenkhatah pawh he hri vei hi an pung. Chutiang karah chuan Mizoram pawhin a theih ang angin a inven hna a thawk mek.
Integrated Disease Surveillance Programme (IDSP) hotute chuan sorkar laipui thu anga kal a nih thu an sawi a, June ni 4 leh ni 5-ah khan sorkar laipui kaihhruaiin mock drill neih a ni a, Mizoram dinhmun leh hri laka himna tura hnathawhte endik a ni tih te an sawi.
He hri hi darh leh ta se, chumi atana Mizoram inbuatsaih dan te, isolation ward eng zat nge awm tih te, oxygen cylinder eng zat nge awm tih te, damdawi a awm tha em tih te, PPE a awm em tih te endik a ni a, sorkar laipuiin lungawi thlak a ti tih thu dawn a ni.
Covid-19 hi hmarchhakah a leng rih lovah ngaih a ni a, hri vei hriat thar an awm a nih pawhin hri a leng tha leh tihna ni lovin, he hri hian khawvel hmun hrang hrang a awm chilh tawh vang a nih thu mithiamte chuan an sawi a, hri vei hriat thar an awm a nih pawhin chiai tur a nih loh thu an sawi.