Cricket-a School inelna zo fel

Cricket Association of Mizoram leh Samagra Shiksha Mizoram thawhhona hnuaia buatsaih Grassroot Cricket Tournament chu January 15, Ningani khan khelh zawh a ni a. Mipa-ah Govt. Midland Comprehensive School, Serchhip an Champion a, hmeichhe lamah Govt. Nepali Middle School, Khatla an Champion bawk.
Hmeichhe Final ah Govt. Nepali Middle School leh Govt. Bethlehem Vengthlang MS-I te an intum a. Govt. Nepali Middle School chuan Wicket 10-in hnehna an chang a, phu takin an champion. Mipa lamah Govt. Midland Comprehensive School, Serchhip te’n Govt. Chhinga Veng MS te run 16-in an hneh a, an champion ve bawk.
Final hi Education Minister Dr. Vanlalthlana’n khuallian niin a hmanpui a. Pu Mathlantea chuan Cricket chu eizawnna tlak a nih thu leh Zirlai naupang te lehkha tha taka zir chunga infiamna lamah a kal theih thu sawiin Cricket chu bansan lova taima taka khel zel turin a chah a. CAM Secretary Pu Lalfakawma Varte pawhin thu sawiin Grassroot Cricket School chu an hlawkpui thu a sawi a, Mizoram Age Level Team-ah player an awm nual thu sawiin Cricket chu eizawnna tha tak a nih thu a sawi bawk.
Grassroot Cricket School-ah hian School 13 thlan niin Tournament-ah hian School 11 an tel thei a ni.
Inelna neih zawh takah hian Mipa lamah Rodinngheta, Govt. Chhinga Veng MS chu Best Batter-ah thlan a ni a. Best Bowler-ah Ngurthantluanga, Govt. Chhinga Veng MS thlan niin
Player of the Tournament-ah Mangliana, Govt. Midland Comprehensive School, Serchhip thlan a ni bawk.
Hmeichhe lamah chuan Lalnunmawii, Govt. Nepali Middle School chu Best Batter-ah thlan a ni a. Best Bowler-ah Urmila Begum, Govt. Nepali Middle School thlan a ni a. Lalnunmawii, Govt. Nepali Middle School chu inelna neih chhunga khel tha ber Player of the Tournament-ah thlan a ni.