Daily Newspaper

Real Madrid an mualpho

33

January ni 2, Pathianni zan khan Spanish La Loga-ah inkhel paruk a awm a, hmahruaitu Real Madrid chu team talbuai Gatafe lakah an mualpho in an tlawm. Real Madrid an tlawm lai hian Barcelona leh Atletico Madrid ten hnehna an chang ve thung.

Inlehthalna lian
Season kal meka khel tha tluang, point 8 a hmahruai fal mek a; an hmahruaina point thuma tihzau belh thei dinhmuna ding Real Madrid chuan khualmualah table hnuai lama awm Getafe an hmachhawn a. Coliseum Alfonso Pérez muala inkhelah inlehthalna lian a thleng a. Awlsam taka chak thei tura ngaih Real Madrid an tlawm teh tlat.

Vawi 19 khel tawh a, point 18 chauh la hmu Getafe hian an mikhual team lian Real Madrid lakah bul an tan tha hle. Inkhel tan atanga minute kuana lekah Enes Ünal chuan Real defender Eder Militao chetsual hremin awlsam takin hmahruaina goal a thun. Hma takah goal an thun vangin Hetafe an phur zui viau a, an goal venghim turin tan an khawh zui nasa viau bawk.

Getafe lakah awlsam taka point thum hmu a, an hmahruaina tihzauh ngei tum Real Madrid in an si phurh sut ngei tumin thapui an thawh a, an khingpuite an nawr bet thei viau. Ball chang tam zawkah tang tluanin hlauhawm an siamchhuak fo. Midfielder Luka Modric chuan goal bar a pet per dawp a, goal thun tluang tak Karim Benzema a che hlauhawm thei viau bawk. Carlo Ancelotti team te hian hlauhawm siam fo mahse Gatafe si nghak David Soria an paltlang thei lo tluan. David Soria hian tha zetin save a nei nual a, hmahruaitu Real Madrid an hneh theih nan mimala thawhhlawk ber a ni hial ang.

2022 kum thara inkhel hmasa berah Real Madrid an mualpho nghal a, anni hi football club zingah kum thar bul tan chhe ber ang hiala ngaih theih an ni a. Hetihlai hian Real Madrid timualphotu Gatafe erawh kum thar bul tan tha bera ngaih theih an ni ve hlauh thung.

Real Madrid hian vawi 20 khelin point 46 an hmu a, point 8 in hma an hruai fal mek. Point 8 zetin sang fal mek mahse an hnuai chiaha awm Sevilla aiin vawihnih zetin an khel tam zawk thung.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy