Critics Choice Awards leh Producers Guild Awards-a che\ha Anora tan Oscar a beiseiawm
Critics Choice Awards leh Producers Guild Awards-a chetha Anora tan Oscar a beiseiawm
‘ ‘Anora’ chuan February ni 7-a Cristics Choice Awards an semah award ngaihhlut ber Best Picture a dawng a, February ni 8-a Directors Guild of America Awards leh Producers Guild of America Awards-ah pawh Best Picture a dawng leh a, Oscar-ah pawh Best Picture dawng tura rinkai ber a ni ta.
30th Annual Critics Choice Awards show hi Barker Hanger, Santa Monica, California-ah neih a ni a, 36th annual Producers Guild Awards (PGA) show hi Fairmont Century Plaza, Los Angeles-ah neih a ni ve thung.
1990 atanga an sem tan atangin PGA best picture dawngtu hian Oscar-ah pawh best picture a dawng zui deuh zel a, kumin tel loa award vawi 35 an sem tawhah vawi 25 chu PGA best picture dawngtuin Oscar-ah pawh he award hi a dawng zui tawh a ni. 2009 hnuah phei chuan award dawngtu tur an thlan dan kalphung a inang tak avangin heng award pahnih te hi a dawngtu a inzul thei lehzual a, 2009 hnuah chuan PGA best picture dawngtuin Oscar best picture a dawn zui ve tak lo hi tum thum chiah a la awm a, 2020 hnuah phei chuan award dawngtu a la thuhmun vek nghe nghe a ni.
PGA Awards-ah hian 1985-a ‘We Are the World’ recording session behchhana Netflix film ‘The Greatest Night in Pop’-in outstanding producer of televised or streamed motion pictures a dawng a, he film hi Grammy-ah pawh khan best music film-ah nominate a ni tawh bawk.
The Wild Robot-in Outstanding Producer of Animated Theatrical Motion Pictures dawngin, tunhnaia award show hrang hrangah pawh animated film category-ah award a dawng deuh zel a, Oscar-ah pawh best animated film dawng tura rinkai a ni ta.
Critics Choice Awards-ah Wicked, Emilia Perez leh The Substance te an langsar ve thung a, award pathum theuh an dawng a, heng film pathum te hi best picture-ah pawh nominate an ni vek a, mahse, e category-ah hi chuan Anora a chungnung ta ber a, Anora hian Critics Choice Awards-ah hian award dang a dawn tel lo thung.