Chisora a chak leh ta

Pathianni zing khan British Heavyweight Derek Chisora chuan Manchester a Co-op Live Arena in Manchester-ah Otto Wallin a hmachhawn a. UK a inhnek a hmachhawn hnuhung ber turah unanimous decision hmangin hnehna a chang.
Palian huanga boxer lar pawl tak ni reng, world champion nih harsat tlat si Chisora hian a khingpui Wallin lakah a khel tha viau a, vawi hnih chu a hnek tlu nghe nghe. A khingpui hnek tluk hma hian a mit ko dinglamah hliam a tuar a, a thisen a chhuak nasa hle. A thisen chhuak nasa viau mah se buai phah lo thung. A khingpui Wallin hi round kuanaa a hnek tluk hnuin round 12-na dawn hnaihah a hnek tlu nawn leh a. A khingpui knockout ngei tum viau mah se hunin a daih ta bik lo. Inhneh hmuhnawm takah hian endiktu pathumin Chisora an chaktir vek a, an ram leilunga inhnek a hmachhawn hnuhnung ber turah point 117-109, 114-112 leh 116-110 in hnehna a chang.
Professional huangah inhnek vawi 49 hmachhawn a, vawi 36 hnehna chang tawh Chisora hian Otto Wallin a hneh vangin kawnghren chuh theihna hun remchang a nei zui thei mai thei. IBF world title kawl mektu Daniel Dubois leh Joseph Parker te chu February 22, 2025 hian kawnghren chuhin an inhnek dawn a. Heta chak zawk zawk hi Chisora hian hmachhawn theih a inbeisei. Champion lai Dubois hi Parker lakah tlawm pawh nise vawi khat tal chu an inhnek nawn leh erawh a rinawm viau thung. Kum 41 hi Chisora hian inhnek vawi 50 a hmachhawn tlinna tura a khingpui tur chu amah tantute thlansak turin a ngen.
Boxing a thawm nei lian, vaupung na tak Chisora hian kum 2012 khan WBC heavyweight champion Klitschko hmachhawnin kawnghren a lo chuh tawh a, World champion a ni zo lo. Kum 2022 khan Tyson Fury hmachhawnin champion ni a tum leh naa a hlawhtling zo chuang lo. Boxing a chawlhsan dawn hnai tawh a, a hun tawp dawn hnaihah World champion a ni thei hlauh a nih chuan ngaihngam takin a chawlh zui thei ngei ang. A mah hi chuan WBA (Super), WBC leh WBO champion Usyk hmachhawn a duh ber a. Usyk a hmachhawn thei lo a nih vek chuan tum hnih heavyweight champion lo ni tawh Anthony Joshua hmachhawn a chak viau bawk.