CS-in chhuanlam siam reng lo turin NHIDCL leh contractor ho a khak
CS-in chhuanlam siam reng lo turin
NHIDCL leh contractor ho a khak
Chief secretary Khilli Ram Meena chuan Kolasib district-a four lane kawng laih mek leh tun dinhmuna kawngpui hman lai mek NH306 & 06 chu a hmunah a enfiah a. Kawng siamtu NHIDCL leh an hnuaia contractor-te chu a chak thei ang bera an hna la peihfel loh thawk turin a hriattir.
Chief secretary hian Counter Insurgency & Jungle Warfare School (CIJWS) Vairengte pawh tlawhin, ram neitute nen ram inhlan chungchanga chinfel leh bawhzui ngai la awm chu CIJW hotute nen an sawiho a. CIJW atang hian Kolasib lam pan chho in four lane kawng laih mek leh kawngpui hman mek thawmthat hna kal lai hi a enfiah zui a ni.
NHIDCL aiawhte leh a kaihhnawih sawrkar department hotute nen an inkawmkhawmnaah chief secretary chuan, National Highway 306 & 06 thawmthat hna hun rei tak chhung thawh a nih tawh hnuah pawh, chhuanlam chi hrang hrang vanga peihfel a la ni thei lo chu pawi a tih thu a sawi a. Nikum lamah pawh he hna hi chak taka kalpui a nih theihnan amah ngei Kolasib-ah kalin hma a lo la tawh a, NHIDCL aiawhten an tiam anga hna an la hlen chhuak lo chu a lungawithlak loh takzet tih a sawi a ni.
Hna an zawh theih loh chhan a an harsatna sawi chu chhuanlam tlingah a ngai lo tih sawiin, “Chhuanlam siam tum tan chuan chhuanlam tur a awm reng thin. Amaherawhchu, a taka hnathawh kan hmu duh,” a ti a. NHIDCL aiawhte chu an contractor rawihte khauh taka thunun tur leh tun aia chak lehzuala hma la turin a chah a; kawng siamthat mek hi April thla chhung ngeia peihfel vek turin a hriattir.
NHIDCL aiawhte sawi danin, Vairengte leh Sairang inkar kawngpui- STMC hna thawh mekah a hmun laipui pathum (km 42–70, km 95–118 leh km 133–147.8) ah hna zaah za zawh a ni tawh a. Hmun thenkhat (km 70–95, km 118–133 leh km 147.8–159) 2025 July-a state PWD kut atanga an lak erawh kawng a chhiat tawh em avangin a tirah harsatna lian tak an tawk an, hei vang hian an contract hna tak tak an tan theih hmain, lirthei tlan theih hramnan thla thum chuang emergency repair hna an thawk tih an sawi a ni.
Hetianga khawtlaina a awm chung hian, alkatra chhah chi (DBM), concrete phah (PQC) leh kawng lungrem (foundation layers) phah mekin, chak takin hna an thawk zel a; heng kawng la bakah hian zaa 30 leh zaa 48 hna zawh tawh a ni a, April chhungin thawmthat hna hi peihfel vek turin theihtawp an chhuah tih an sawi.
Chief secretary hi NHIDCL aiawh leh department hotute nen an inkawm hnu hian Sairang lam panin kawng thawmthat mek hi a en zui nghal a. NHIDCL hotute bakah PWD hotute leh district administration hotuten an tawiawm a ni.