CSR Cell-in hmalak tawhna thlirlet

CSR Cell-in hmalak tawhna thlirlet
Mizoram sawrkar din CSR Cell chu an chairman. adviser to CM TBC Lalvenchhunga, MLA hoin Nilaini khan an thukhawm a. Hma an lak tawhna thlirletin, hmachhawp an neih an sawiho.
December 10 khan CSR Cell hian Mizorama CSR (corporate social responsibility) fund dil thei registration nei leh neih tum pawl, sawrkar department, agency leh deputy commissioner zawng zawng sawmin hriat ngai an lo inhrilh tawh a. Hemi tuma an hun hman hi thlirletin, ngaihventu an tha tawk nia an hriat avangin an lawm hle tih sawi a ni.
Zau zawka inhrilhhriat dan an ruahman belh a, nakkum lama CSR Conclave liantham buatsaih pawh sawi a ni.
CSR fund dil thei registration nei society, sawrkar agency leh department leh CSR Fund pe thin corporate aiawhte inthlun zawmna tur, online CSR matchmaking platform an duan mek pawh an peih tep tawh thu sawi a ni bawk.
India ramah CSR Fund tam tham tak kumtin a awm reng a. A dil thei leh dil thiam Mizoramah an tlem avangin CSR Fund dawng tlem ber state a ni thin. Tam zawka CSR Fund hmuh a nih theihnan sawrkar chuan CM office-ah CSR Cell a din a. He Cell hian CSR dil thei tura registration neih dan, registration neiten awlsam taka an dil theih dan tur zirtir, proposal siam dan, CSR pe thei company-te nen inthlunzawmna turin a bawhzui mek. Helama tui leh tihtum tan CSR Cell hi englai pawha dawr theih a ni.