CSR pe thei leh a diltute inzawn tawnna tur CSR Connect duang

CSR pe thei leh a diltute inzawn
tawnna tur CSR Connect duang
Mizoram CSR Cell Planning & Programme Implementation leh United Nations Development Programme India tangho buatsaih, corporate social responsibility diltu leh a petute inzawnna tur leh inthlunzawmna tur (CSR matchmaking portal) Mizoram CSR Connect chu Thawhlehni khan chief minister Lalduhoma’n a hawng.
Chief minister chuan, kum 2023- 2024 CSR data atanga a lan danin, Mizoram-in India rama CSR hman chhuah zawng zawng zaa 0.06 chauh a hmu a. CSR hmangin hmasawnna hna lian leh tangkai a thawh theih avangin 2024 June khan Chief Minister Office-ah CSR Cell an din a. Hma an lakna azarah a petute leh a diltute inzawnna, Mizoram CSR Connect an hawng thei ta tih a sawi.
He portal hian CSR lamah awlsamna tam tak a thlen an beisei a, a petute tan pawh langtlang taka CSR kalpui a nih zia hriatna a ni dawn tih a sawi a ni.
Mizoram chu state ralmuang, eiruk tlemna, ziak leh chhiar thiam tamna, khuarei daih hmasawnna SDG lama hma la tha, mipuiin tlawmngaihna rilru pua engkim an tihna ram a nih avangin corporate-te tan CSR hmanga luan chhuahna hmun tha a ni tih chief minister hian a sawi a. CSR nei company leh an hnuaia civil society-te chu Mizorama an CSR hmang turin a sawm tih a sawi a ni.
UNDP India resident representative Angela Lusigi chuan UNDP-in India ramah hmalakna tam tak a nei a, an ngaihpawimawh chu khuarei daih hmasawnna (sustainable development), hmeichhiate chawikanna, nungcha leh ramngaw venhimna lam a ni, tiin, Mizoram nena thawkho zel turin an inpeih reng a, CSR hmanga hmalakna a hlawhtlin theihnan data dik behchhana ruahmanna siam leh kalpui a pawimawh tih a sawi.
Mizoram CSR Cell chairman, adviser to CM TBC Lalvenchhunga chuan CSR hmanga hmalak theihna langsar zual a sawizau a. Mizoram Start-Up Mission leh corporate/ institution pahnihin an inremna (MoU) lehkha an inhlan. India ram hmun hrang hrang atangin CSR pe thei corporate aiawh leh CSR dil thei pawl (agency) aiawh an tel a ni.